बुद्धशान्तिमा सम्पन्न दोस्रो बुद्धशान्ति वडास्तरीय फुटबल प्रतियोगिताको उपाधि वडा नम्बर ३ ले उचालेको छ ।
शनिबार भएको उपाधि भिडन्तमा बुद्धशान्ति वडा नम्बर १ लाई शुन्यका बिरुद्ध १ गोल गर्दै वडा नम्बर ३ च्याम्पियन बन्न सफल भएको हो ।
च्याम्पियन बन्न सिद्धार्थ लिम्बुको एक मात्रै गोल निर्णायक बनेको थियो । खेलको दोस्रो हाफमा बुद्धशान्ति १ का भरपर्दा डिफेन्डर पवन परियारले रेड कार्ड पाएपछि मैदान छोडेको मौकालाई सदुपयोग गर्दै लिम्बुले गोल गरेका थिए ।
प्रतियोगिताको च्याम्पियन बनेसँगै बुद्धशान्ति-३ ले नगद ३० हजार रुपैयाँ, ट्रफी, मेडल प्राप्त गर्यो भने उपबिजेतामा सिमित डिफेन्डिङ च्याम्पियन वडा नम्बर १ ले २० हजार रुपैयाँमा चित्त बुझाएको छ ।
प्रतियोगितामा उदयमान खेलाडी युवस तामाङ्ग, सर्बोउत्कृष्ट बिजय लिम्बू, गोलरक्षक रिजन ल्वागुन, डिफेन्डर भुपाल मगर,मिडफिल्डर पुजन थापा, उच्च गोलकर्ता जेनिथ बराल र कोच मिलन मुखिया घोषित हुँदै पुरष्कृत भएका छन् ।
उनीहरुलाई प्रमुख अतिथि बुद्धशान्ति गाउँपालिका अध्यक्ष मनोज प्रसाईं, उपाध्यक्ष भवानीप्रसाद खतिवडा, बुद्धशान्ति खेलकुद बिकास समिति संयोजक तथा वडा नम्बर ३ का वडाध्यक्ष पर्शुराम चेम्जोङ, वडाध्यक्षहरु अनिल वाग्ले, शेर बहादुर राय, शिवराज पौडेल, चन्द्र भण्डारी, आयोजक समितिका अध्यक्ष बालकुमार राईले पुरष्कृत गरेका थिए ।
