झापाका तीन जना पत्रकारलाई ‘साझामञ्च दशक सेवा सम्मान’ प्रदान गरिएको छ ।
साझामञ्च मिडिया प्रालिले १२ औं स्थापना दिवस एवम् वार्षिक साधारणसभाको अवसरमा पत्रकार सरोज भट्टराई, उमानाथ भण्डारी र द्रोण अधिकारीलाई सम्मान गरेको हो ।
बिर्तामोडमा आज आयोजित कार्यक्रमकाबीच तीन जना पत्रकारलाई कोशी प्रदेशका खानेपानी, सिचाई तथा उर्जा मन्त्री एकराज कार्की, बिर्तामोड नगर प्रमुख पवित्रा महतारा प्रसाईंले नगद ११ हजार, कदरपत्रसहित सम्मान गरेका हुन् ।
साझामञ्चमा स्थापनाकालदेखी आवद्ध रहेर निरन्तर सेवारत पत्रकारहरुलाई सम्मान गरिएको कार्यकारी प्रमुख गोपाल काफ्लेले जानकारी दिए ।
उक्त अवसरमा साझामञ्चले नेपाल पत्रकार महासंघ झापा, कोशी प्रदेश र केन्द्रमा विभिन्न जिम्मेवारीमा निर्वाचित हुने पत्रकारहरुलाई बधाई ज्ञापन गरेको छ ।
कार्यक्रमका प्रमुख अतिथि मन्त्री कार्कीले वेथिती र अराजकता विरुद्ध मिडिया क्षेत्रले बलियो ढंगबाट कलम चलाउनुपर्ने बताएका छन् । उनले पछिल्लो समय गलत सूचनाका कारण समाजमा निराशा बढाएकोमा चिन्ता व्यक्त गरेका थिए ।
मिडियाका उपाध्यक्ष खड्गप्रसाद दाहालको अध्यक्षतामा भएको कार्यक्रममा बिर्तामोड नगर प्रमुख पवित्रा महतारा प्रसाईं, प्रेस काउन्सिलका सदस्य गणेश पोखरेल, पत्रकार महासंघ कोशी प्रदेश उपाध्यक्ष अम्बिका भण्डारी, झापाका उपाध्यक्ष सुब्रत न्यौपाने लगायतले आ-आफ्ना धारणा राखेका थिए ।
निर्देशक सुवास भट्टराईले मन्तव्यबाट स्वागत गरेको कार्यक्रमको सञ्चालन कार्यकारी प्रमुख गोपाल काफ्लेले गरेका थिए ।
यस्तै सोही अवसरमा साझामञ्च मिडिया प्रालिको वार्षिक साधारण सभाको बन्दसत्रले तीन वर्षे कार्यकालका लागि निर्वाचित सञ्चालक समिति सर्वसम्मत चयन गरेको छ ।
मिडियाको अध्यक्षमा एकराज कार्की, उपाध्यक्षमा खड्गप्रसाद दाहाल, सचिवमा गोपाल काफ्ले तथा सञ्चालक सदस्यहरुमा नारायणप्रसाद पोखरेल, कृष्णप्रसाद घिमिरे, पुण्यप्रसाद भट्टराई रहेका छन् ।
सचिव गोपाल काफ्लेलाई कम्पनीको कार्यकारी प्रमुख र साझामञ्चले सञ्चालन गरेका सञ्चार माध्यमहरुको प्रधान सम्पादकमा निरन्तरता दिने निर्णय गरिएको बताइएको छ ।
