इलाम। लोपोन्मुख लाप्चा जातिको नामवन अर्थात नववर्ष पर्वका दिन आज इलामकाे दुइ वटा स्थानीय तहले सार्बजनिक बिदा दिएका छन् । राेङ गाउपालिका र सुर्याेदय नगरपालिकाले स्थानीय बिदा दिने निर्णय गरेका हुन्।
सूर्योदय नगरपालिकाको सातौ नगरसभाबाट लाप्चा जातिको नयाँ बर्षमा विदा दिने निर्णय गरिसकेकाे थियाे भने राेङ गाउपालिकाकाे हिजाे आइतबार बसेकाे कार्यपालिकाकाे बैठकले साे निर्णय गरेकाे हाे ।
यसै बिच लाप्चा हरुकाे नया बर्षकाे पर्बमा बिदा दिने निर्णयकाे नेपाल आदिवासी जनजाती महासंघ सुर्याेदय नगर समन्वय परिषद (नेफिन) ले निर्णयलाई सकारात्मक कदमको रुपमा स्वागत गरेको छ ।
अध्यक्ष सोनाम योल्मोले विज्ञप्ती जारी गर्दै संघीयताको असल कार्यान्वयनसंगै ऐतिहासिक विभेदबाट पिरोलिएका लोपोन्मुख लाप्चा जातिको मुहारमा खुशीयाली छाएको बताउनुभयो ।
नेपाल सरकारद्वारा आदिवासी जनजाती प्रतिष्ठान ऐन २०५८ अनुसार सूचिकरण भएका ५९ जातिहरु मध्ये लाप्चा पनि एक हो । सरकारको वर्गिकृत पाँच सुची अनुसार लोपोन्मुख समूहको दश जाति मध्ये एकमा पर्ने लाप्चाहरुले आफ्नो चाड पर्वले पहिचान बोकेको ठान्छन् ।
लाप्चा उत्थान मञ्चको २०७५ को सर्भेक्षण अनुसार इलाममा ३ हजार ६० जना लेप्चा रहेका छन् । इलामको सुर्योदय नगरपालिका, रोङ गाउँपालिका, इलाम नगरपालिका र माइजोगमाई गाउँपालिकामा लेप्चा समुदायको बसोबास रहेको छ।
