झापाको झापा गाउँपालिकाले खेतबारीमै बिजुली पुर्याएको छ ।
किसानहरुलाई खेती गर्न सजिलो र आय आर्जन बढाउने उद्देश्यले उनीहरुको खेतबारीमै बिजुली पुर्याइरहेको कार्यवाहक अध्यक्ष अन्जुदेवी थपलियाले जानकारी दिइन् ।
कार्यवाहक अध्यक्ष थपलियाका अनुसार किसानको खुसीको लागि गाउँपालिकाले विद्युत महसुलमा लाग्ने ८० प्रतिशत रकम समेत चालू आर्थिक वर्ष २०८१/०८२ को बिनियोजन बजेट मार्फत तिरिदिने भएको छ ।
झापा गाउँपालिकामा २०७४/०७५ को बजेट मार्फत नै तत्कालीन अध्यक्ष जयनारायण शाहले किसान हितको लागि शुरु गरेको बिजुली बिस्तार कार्यक्रमले अहिलेसम्म निरंतरता पाएको छ । झापाका ७ वडामा हालसम्म ५ हजार बिजुलीका पोल किसानका खेतबारीमा तारसहित जोडिएको देख्न सकिन्छ भने ८ सय पोल यस आर्थिक बर्षमा जोडिन लागेको गाउँपालिका प्रमुख प्रशासकीय अधिकृत गजेन्द्र थपलियाले जानकारी दिए ।
पालिकाले किसान हितमा विद्युतमा लाग्ने महसुल मात्रै होइन, सिचाई मोटर ,स्प्रे ट्यान्की समेत साझेदारी कार्यक्रम अन्तरगत उपलब्ध गराउदै आएको छ भने ५० युनिट सम्म सबै नागरिकको विद्युत महसुल समेत पालिकाले नै तिर्दै आएको प्रमुख प्रशासकीय अधिकृत थपलिया बताए ।
मकै, धान, केरा र तरकारी खेती गर्ने किसानलाई पालिकाले ६०% सिचाईको लागि विद्युत महसुल तिरिदिदैं आएकोमा यस आर्थिक बर्षदेखी ८० प्रतिशत तिरिदिन लागेको हो ।
विद्युतमा सहुलियत सहित झापा गाउँपालिकालाई प्रधानमन्त्री कृषि परियोजना मार्फत मकै पकेट जोन क्षेत्र घोषणा गरि किसानको खुसीको लागि उनिहरुलाई चाहिँने आवश्यक मल, विउ र औजार र प्राविधिक सहयोगलाई प्राथमिकता दिएको देख्न सकिन्छ ।
कृषि शाखाका अनुसार गाउँपालिकाले मकै पकेट जोन क्षेत्र घोषणा गरेपछि मकै रोप्ने मेसिन, मकै छोडाउने मेसिन, स्प्रे ट्याङ्की, मकै सुकाउने झुल र सिचाईको लागि मोटर अनुदान सहयोगमा उपलब्ध गराउदै पालिका भित्र आवद्ध ९२ ओटा कृषि समुहलाई आवश्यक तालिम र अनुदानको व्यवस्था समेत गर्दै आएको छ ।
झापा गाउँपालिकाले २०७४/०७५ आर्थिक बर्ष देखी अध्यक्ष जयनारायण शाहले आर्थिक विपन्न झापा गाउँ बासीको हितमा महत्त्वपूर्ण काम गरेको देख्न सकिन्छ भने त्यसै कार्ययोजनालाई अहिले सम्म निरंतरता दिदै झापाकै नमुना गाउँपालिकाको रूपमा स्थापित हुँदै गएको छ ।
