प्रथम झापा १ काठमाडौँ कप फुटसल प्रतियोगिताको उपाधि साबिक मेचीनगरले जितेको छ ।
नेपाली कांग्रेस झापा १ सांसद सचिवालय तथा झापा १ काठमाडौँ सम्पर्क समिति काठमाडौँको संयुक्त आयोजनामा जावलाखेलस्थित डिएभी स्कुलमा भएको प्रतियोगिताको फाइनलमा साविक धाइजनलाई ४-३ ले पराजित गर्दै साविक मेचीनगरले उपाधि हात पारेको हो ।
निक्कै रोमाञ्चक बनेको खेलमा धाइजनका देवासिस प्रसाईँले ह्याट्रिक गरे पनि उपाधि दिलाउन सकेनन् । प्रथम कार्कीले मेचीनगरलाई सुरुआती अग्रता दिलाएका थिए । तर, देवासिसले धाइजनलाई खेलमा फर्काए । त्यसपछि रोहन कार्कीले लगातार दुई गोल गर्दै अग्रता ३-१ मा पुर्याए । तर, देवासिसले अर्को गोल गर्दै धाइजनलाई ३-२ को स्थितिमा ल्याए । लगत्तै प्रथमले अर्को गोल गर्दै मेचीनगरलाई ४-२ को अग्रता दिलाएका थिए ।
खेलको अन्त्यतिर देवासिसले पेनाल्टीमार्फत गोल गर्दै ह्याट्रिक पूरा गरे । तर, उक्त ह्याट्रिकले धाइजन खेलमा फर्किन सकेन । यद्यपि, उनी नै खेलको प्लेयर अफ द म्याच चुनिए । प्रतियोगितामा साविक मेचीनगर र साविक धाइजनसँगै साविकका शान्तिनगर, दुवागढी, बाहुनडाँगी, चन्द्रगढी र ज्यामिरगढीले सहभागिता जनाएका थिए ।
मेचीनगरले पहिलो सेमिफाइनलमा बाहुनडाँगीलाई ५-१ ले पराजित गर्दै उपाधि यात्रा तय गरेको थियो भने धाइजनले भने दोस्रो सेमिफाइनलमा ज्यामिरेगढीलाई ३-० ले पाखा लगायो । ज्यामिरेगढीले ‘बाइ’ पाउँदै सिधैं अन्तिम चारमा स्थान बनाएको थियो । तर, उक्त मौकालाई ज्यामिरेगढीले सदुपयोग गर्न सकेन र यहीबाट आफ्नो यात्रा समाप्त गर्यो ।
उपाधिसँगै विजेता मेचीनगरले २१ हजार रुपैयाँ प्राप्त गर्यो भने उपविजेता धाइजनले ११ हजार रुपैयाँमा चित्त बुझायो । उपाधिसँगै मेचीनगरले व्यक्तिगत पुरस्कारमा पनि कब्जा जमायो । प्रतियोगिताको उत्कृष्ट गोलकिपर मेचीनगरका जयश खनाल घोषित भए भने प्लेयर अफ द टुर्नामेन्ट रोहन बूढाथोकी र सर्वाधिक गोलकर्ता अंकित दुलाल रहे । मेचीनगरलाई फाइनलमा पुर्याउन अंकितले सर्वाधिक आठ गोल गरेका थिए ।
उक्त अवसरमा नेपाली कांग्रेसका महमन्त्री विश्वप्रकाश शर्माले निर्णायक समितिमा रहेका नेपाली टोलीका पूर्वप्रशिक्षक तथा पूर्वकप्तान हरि खड्का र अमनप्रताप अधिकारीलगायतले बनाएको उत्कृष्ट खेलाडीको सूचीबाट एक टोली बनाउने जानकारी दिए ।
विजेता र उपविजेता टोलीसँगै व्यक्तिगत पुरस्कार जित्ने खेलाडी र प्रतियोगितामा सहभागिता जनाउने खेलाडीलाई महामन्त्री शर्माले पुरस्कार वितरण गरेका थिए ।
विश्वप्रकाशको दुई गोल
सोही अवसरमा भएको मैत्रीपूर्ण खेलतर्फ कांग्रेस महामन्त्री विश्वप्रकाश शर्माको दुई गोलसँगै राजनीतिक दल विजयी भएको छ ।
राजनीति दलले कलाकारको टोलीलाई ६-१ ले पराजित गरेको हो । शर्माले पहिलो हाफमै दुई गोल गरेका थिए । यस्तै, भास्कर काफ्ले पनि पहिलो हाफमा दुई गोल गर्दा राजनीतिक दलले ४-० को फराकिलो अग्रता लिएको थियो ।
दोस्रो हाफमा भने तीन गोल भयो । राजनीतिक दलका बालकुमार केसी र रञ्जित तामाङले समान एक-एक गोल थपे भने कलाकारबाट बालकृष्ण निरौलाले गरेको गोल सान्त्वना रह्यो ।
त्यसैगरी अन्य मैत्रीपूर्ण खेलमा महिला ‘ख’ ले महिला ‘क’ लाई १-० ले पराजित गर्यो । महिला ‘ख का लागि युनिशा प्रसाईँले गरेको गोल नै निर्णायक बनेको थियो ।
त्यस्तै अर्को खेलमा पेसा व्यवसायीले कर्मचारीमाथि ६-२ को सानदार जित हात पारेको थियोे ।
प्रतियोगिताको उद्घाटन सभामुख देवराज घिमिरेले गरेका थिए । उनले यस किसिमका प्रतियोगिताले समाजमा लुकेका प्रतिभालाई उजागर गर्न महत्त्वपूर्ण भूमिका खेल्ने बताए । राजनीतिक दलबाट यस्ता गतिविधी हुन सराहनीय भएको उल्लेख गरेका थिए ।
प्रतियोगिताको उद्घाटन समारोहमा झापा जिल्लाका कांग्रेस, एमाले, राप्रपा, माओवादीसहित राजनीतिक दलका नेताहरूको बाक्लो उपस्थिति रहेको थियो ।
