झापामा पटका पड्किने क्रम यस वर्षको तिहारमा पनि रोकिएको छैन । झापाका विभिन्न पालिकाहरुमा अत्यधिक रुपमा पटका पड्किएका छन् ।
बिहीबार लक्ष्मी पूजाको बेलुकादेखि नै पटका पड्काउने क्रम बढेको र आज पनि चलिरहेको छ । लगातार पटका पड्काउँदा ध्वनी प्रदूषण भएको र आगलागीको जोखिम पनि बढेको प्रहरीले जनाएको छ ।
नेपाल प्रहरीले भने पटका तथा विष्फोटक पदार्थ नियन्त्रणमा १५ वटै पालिकामा सुरक्षा निगरानी बढाइएको तथा विभिन्न क्षेत्रमा जाँच अभियान तीव्र भइरहेको दाबी गरेको छ ।
प्रहरीलाई छलेर यस्ता गतिविधि छिटफुट घटना भएमा पक्राउ गर्ने र कारबाही गर्ने गरिएको बताएको छ ।
झापाको दमकमा पटका पड्काउने क्रममा केही दिन अगाडी एक बालक गम्भीर घाइते भएका थिए । दमक नगरपालिका वडा नं.६ बस्ने ६ वर्षीय बिद्यम अग्रवाल पटका पड्काउने क्रममा घाइते भएका हुन् ।
उनको अनुहार जलेको छ । घाइते बालकलाई उपचारको लागि लाईफ लाईन अस्पताल दमकमा लगिएकोमा त्यहाँ उपचार सम्भव नभएपछि थप उपचारको लागि भारतको सिलिगुडीतर्फ रेफर गरिएको छ ।
