मेचीनगर नगरपालिकाले बालसुबोधिनी माध्यमिक विद्यालयलाई विद्यालय गाडी हस्तान्तरण गरेको छ ।
नगरपालिकाले मेचीनगर नगरपालिका वडा नं.१४ स्थित बालसुबोधिनीलाई म्याजिक भ्यान हस्तान्तरण गरेको हो ।
सामुदायिक विद्यालयमा विद्यार्थीको आकर्षण बढाउन मेचीनगर नगरपालिकाको नौ लाख र मेचीनगर नगरपालिका वडा नं.१४ को १७ लाख ५० हजार गरी कुल २६ लाख ५० हजार रुपैयाँ लगानीमा म्याजिक भ्यान खरिद गरिएका हो ।
सामुदायिक विद्यालयमा विद्यार्थी टिकाइ राख्न विद्यालयलाई स्कूल गाडी हस्तान्तरण गर्ने योजना बमोजिम नगर प्रमुख गोपालचन्द्र बुढाथोकी, उपप्रमुख मीना पोखरेल उप्रेती, १४ नम्बर वडाका वडाध्यक्ष बाबुलाल सुब्बाले एक कार्यक्रमका बीच सवारी साधनको आवश्यक कागजात विद्यालय व्यवस्थापन समितिका अध्यक्ष शंकरलाल राजवंशी, सदस्य लोकेश्वर राजवंशी र प्रधानध्यापक विश्व थापालाई संयुक्तरुपमा हस्तान्तरण गरेका थिए ।
विभिन्न क्षेत्रमा कार्यरत मजदुरका छोराछोरीहरु अध्ययन गर्ने त्यस विद्यालयमा अहिले सिटी सफारी र टेम्पोमा विद्यार्थी आउने गरेका छन् ।
बालसुबोधिनी हरेक दृष्टिकोणले विद्यार्थीदेखि अभिभावकासम्मको रोजाईमा पर्ने गरेको छ । जिल्लाभित्र र बाहिर थुप्रै विद्यार्थी शिक्षक अध्ययन अवलोकनका लागि आउने गरेका छन् ।
