झापामा कन्डक्टरले चलाएको बसले मोटरसाइकललाई ठक्कर दिँदा मोटरसाइकल चालकको मृत्यु भएको छ ।
सोमबार साँझ अन्दाजी ७:०० बजेको समयमा कन्काई नगरपालिका वडा नं.२ पवित्रा पेट्रोल पम्पनजिक पूर्वपश्चिम राजमार्गमा धरानबाट काँकडभिट्टातर्फ आउँदै गरेको प्रदेश १-०१-००१ ख ३४२३ नम्बरको बसले बिर्तामोडबाट सुरुङगातर्फ जाँदै गरेको को १९ प ६२८२ नम्बरको मोटरसाइकललाई ठक्कर दिँदा मोटरसाइकल चालक कमल गाउँपालिका वडा नं.५ बस्ने बर्ष अन्दाजी ४१ का लक्ष्मीप्रसाद सुब्बाको मृत्यु भएको हो । तत्काल नाम, थर, वतन नखुलेका घाइतेलाई बीएण्डसी हस्पिटल ल्याइएकोमा राति ८:०० बजे चिकित्सकले मृत घोषणा गरेका थिए ।
धरानबाट काँकडभिट्टातर्फ आउने क्रममा सो बसले दिउँसो ४:३० बजे बेलवारीमा अर्को मोटरसाइकललाई ठक्कर दिएको थियो । बसले मोटरसाइकल चालकलाई सामान्य ठक्कर दिई सवारी दुर्घटना हुँदा बस चालक ईलाम माई नगरपालिका वडा नं.८ बस्ने अन्दाजी बर्ष २२ का सागर थुलुङ राई सोही स्थानमा झरी घाइते पक्षसँग छलफल गर्न बसेका थिए । सोही स्थानबाट बसका कन्डक्टर शिवसताक्षी नगरपालिका वडा नं.६ बस्ने बर्ष अन्दाजी २७ का पुण्य सिटौलाले चलाई ल्याउने क्रममा दुर्घटना भएको थियो ।
दुर्घटना गराउने सिटौला फरार रहेका छन् । फरार रहेका बसका चालक राई र सह-चालक विराटनगर महानगरपालिका वडा नं.२ बस्ने बर्ष अन्दाजी १९ का दिपेश दर्जीलाई भने इलाका प्रहरी कार्यालय बिर्तामोडले नियन्त्रणमा लिएको जिल्ला प्रहरी कार्यालय झापाले जनाएको छ ।
