नेपाल विद्युत प्राधिकरणको अनारमनी वितरण केन्द्रमा सुविधासम्पन्न इन्डोर महशुल केन्द्र निर्माण गरिएको छ ।
बिहीबार एक कार्यक्रमका बीच नेपाल विद्युत प्राधिकरण कोशी प्रदेश प्रादेशिक कार्यालयका प्रमुख उमेशकुमार झाले उद्घाटन गरेका हुन् ।
महशुल बुझाउन आउने ग्राहकहरुलाई कुनै पनि समस्या नहोस् भन्ने उद्देश्यले सुविधासम्पन्न इन्डोर महशुल केन्द्र निर्माण गरिएको अनारमनी वितरण केन्द्रका प्रमुख संजीवकुमार शाहले बताए ।
महशुल संकलन केन्द्रमा ग्राहकहरुका लागि तातो र चिसो पानी पिउने व्यवस्था, पंखा, मोबाइल चार्ज, टेलिभिजन,वाइफाई लगायतका सुविधा उपलव्ध गराइएको उनले जानकारी दिए । टोकन प्रणालीको व्यवस्था रहेको अनारमनी वितरण केन्द्रको महशुल केन्द्रमा पाँचवटा काउन्टर रहेका छन् ।
महशुल केन्द्रको उद्घाटन गर्दै प्राधिकरणका कोशी प्रदेश प्रादेशिक कार्यालयका प्रमुख झाले ग्राहकलाई सेवा प्रवाहमा सहजता दिनु नै सेवा प्रदायक निकायको पहिलो प्राथमिकता हुनुपर्नेमा जोड दिए ।
अनारमनी वितरण केन्द्रका प्रमुख शाहको अध्यक्षतामा भएको कार्यक्रममा प्रादेशिक कार्यालयका लेखा प्रमुख महादेव भट्टराई, भद्रपुर वितरण केन्द्रका प्रमुख राजमणि बजगाई, अनारमनी वितरण केन्द्रका आय प्रमुख गणेश पौडेल, कर्मचारी युनियनका दुर्गाप्रसाद पोखरेल लगायतले शुभकामना मन्तव्य राखेका थिए ।
लेखा अधिकृत विकास दाहालले मन्तव्यबाट स्वागत गरेको कार्यक्रमको सञ्चालन प्रशासन प्रमुख प्रकाश विकले गरेका थिए ।
