बिर्तामोड निवासी समाजसेवी तथा व्यवसायी निर्मल भट्टराईले आफ्नो जन्मदिनको अवसरमा आमा गुमाएका मेचीनगर-१२ का विपन्न परिवारका तीन बालबालिकाको निर्माणाधिन घरका लागि आर्थिक सहयोग गरेका छन् ।
नेपाल अलैंची व्यवसायी महासंघका केन्द्रिय अध्यक्ष तथा बिभिन्न संघसंस्थामा आबद्ध युवा व्यवसायी भट्टराईले बिहिबार पर्न गएको जन्मदिनमा आमा गुमाएका बालबालिकाको बन्दै गरेको घरका लागि नगद ११ हजार रुपैंया सहयोग गरेका हुन् ।
एक महिना अघि ती बालबालिकाकी आमा पदमा भुजेलको ४८ वर्षको अल्पायुमै निधन भएको थियो । दैनिक ज्यालादारी काम गरेर परिवारको भरणपोषण गर्दै आएकी पदमाको निधनपछि दुई छोरा रोहन भुजेल (कक्षा ५), तारा भुजेल (कक्षा ४) र एक छोरी करुणा भुजेल (कक्षा २)को बिचल्ली भएको हो ।
पत्रकार खगेन्द्र घिमिरेको पहलमा भुजेलको काजकिरिया खर्च जुटेको थियो भने हाल उनै घिमिरेको संयोजनमा बास बस्नलायक पक्की घर निर्माणको कार्य धमाधम भइरहेको छ ।
मेचीनगर-१२ को खोला बगरमा रहेको पानी चुहिने झुपडीमा उनीहरु बस्दै आएका थिए । बगरको दश धुर ऐलानी जग्गामा बनेको उक्त झुपडीमा हाल पक्की घर बन्दै छ । व्यवसायी भट्टराई, उनकी आमा मायादेवी भट्टराई, बैनी शान्ता बिष्टले संयुक्तरुपमा उक्त सहयोग रकम घर निमार्ण समितिका संयोजक पत्रकार घिमिरेलाई प्रदान गरेका हुन् ।
भट्टराईले विगतमा पनि यसरी नै जन्मदिन मनाउने गर्दै आएका छन् । उनले सामाजिक उत्तरदायित्व वहन गर्दै केहि सानो सहयोग गरेको बताउंदै आगामी दिनमा पनि दिनदु:खी र विपन्नका लागि सहयोग गर्ने प्रतिबद्धता ब्यक्त गरेका थिए ।
त्यसैगरी भट्टराईले आजै झापाको बिर्तामोड-७ स्थित बाह्रघरेका एक विपन्न परिवारलाई खाद्ययन्न सहयोग गरेका छन् । उनले अशक्त बुद्धराज चौधरी र सुत्केरी देबकी चौधरीलाई उनीहरुको घरमै पुगेर सहयोग गरेका हुन् ।
उनले चामल, दाल, चना, तेल लगायतका सामाग्री र नगद समेत प्रदान गरे । भट्टराईसहित उनकी आमा मायादेवी, श्रीमती सुमित्रा भट्टराईले उनीहरुलाई संयुक्त रुपमा उक्त सामाग्री हस्तानतरण गरेका थिए ।
भट्टराईले गरेको सहयोगको सुन्दर निचाझोडा सामुदायिक वनका अध्यक्ष तथा स्थानीय बद्री प्याकुरेल, बालबालिका तथा शिक्षा सञ्चार मञ्चका संयोजक सरोज पौडेलले प्रशंसा गर्दै धन्यवाद प्रकट गरेका थिए ।
