टी-२० शृङ्खलाको अन्तिम खेलमा नेपालले वेष्ट इन्डिज ‘ए’लाई ६ विकेटले पराजित गरेको छ ।
यसअघि नेपालले लगातार तीन खेलमा हार बेहोरेको थियो । नेपालले पहिलो खेलमा भने वेष्ट इन्डिज ‘ए’लाई चार विकेटले हराएको थियो । नेपाल त्यसपछिको दोस्रो खेलमा १० रन, तेस्रो खेलमा ७६ रन र चौथो खेलमा २८ रनले पराजित भएको थियो ।
कीर्तिपुरस्थित त्रिवि क्रिकेट मैदानमा आज वेस्ट इन्डिज ‘ए’ले टस जितेर पहिला ब्याटिङ गर्दै निर्धारित २० ओभरमा सात विकेट गुमाएर एक सय ७२ रन बनायो । वेस्ट इन्डिज ‘ए’का लागि एलिक एथानाजेले सर्वाधिक ४२ रनको योगदान दिए ।
यस्तै रोस्टन चेसले ३३ रन बनाए । उजोनसन चाल्र्सले २४, म्याथ्यु फर्डले २३ बनाएका थिए । बलिङतर्फ नेपालका सोमपाल कामी र सागर ढकालले तीन-तीन तथा अभिनाश बोहराले एक विकेट लिएका थिए ।
एक सय ७३ रनको विजयी लक्ष्य पछ्याएको नेपालले १८ दशमलव पाँच ओभरमा चार विकेट गुमाउँदै पूरा गरेको हो ।
नेपालका लागि आसिफ शेखले ५१ रनको योगदान दिए भने अनिल शाहले ५८ रन बनाएका थिए । कुशल मल्लले नटआउट ३७ बनाए ।बलिङतर्फ वेष्ट इन्डिज ‘ए’का ओबेद म्याककोयले तीन तथा म्याथ्यु फर्डले एक विकेट लिएका थिए ।
