झापा । नेपालीहरुको महान चाड दशैंको अवसर पारेर झापाको कनकाई –९ घैलाडुव्वा बजारमा दुई दिवसिय दशै मेला तथा साँस्कृतिक कार्यक्रमको आयोजना गरिएको छ। घैलाडुब्बा युवा क्लव र नवदुर्गा मन्दिर घैलाडुब्बाको संयुक्त आयोजनामा असोज १८ गते मंगलबार महानवमी र १९ गते बुधबार विजयादशमीका दिन दशै मेला तथा सास्कृर्तिक कार्यक्रमको आयोजना गरिएको हो ।
मेलाको महानवमिका दिन विभिन्न जातजातीका संस्कृति झल्कने नृत्य, हण्डी फोर्नेलगायतका विविध खेल कार्यक्रम , मनोरञ्जनात्मक साँस्कृतिक कार्यक्रम गरिने तथा विजयादशमीका दिन प्रतियोगितात्मक सन्थाल नृत्य गरी मेलाको समापन गरिने भएको छ ।
विजयादशमीका दिन गरिने प्रतियोगितात्मक सन्थाल नृत्यका विजेता प्रथमलाई २० हजार नगद, दोश्रोलाई १५ हजार नगद , तेश्रोलाई ११ हजार नगद ,सान्तवनालाई नगद र सहभागिलाई अन्य पुरस्कार र प्रमाणपत्र प्रदान गरिने आयोजक समितिले जनाएको छ ।
झापाको कनकाई –९ घैलाडुव्वा बजारमा परम्परादेखि सन्थाल मेलाको आयोजना गरिँदै आइरहेकोमा यसवर्ष दुई दिवसिय दशै मेला तथा सास्कृर्तिक कार्यक्रमको आयोजना गरिएको घैलाडुब्बा बजार व्यवस्थापन समितिका अध्यक्ष सागर ढकालले बताए । सन्थाल समुदायको संस्कृति संरक्षण एवम् प्रर्वधन गर्ने उदेश्यले आयोजना गरिएको सन्थाल नृत्य प्रतियोगितामा सहभागिता जनाउन उनले झापाका सन्थाल नृत्य टोलिलाई आग्रह गरेका छन् ।
