बिर्तामोड । झापाको बिर्तामोडस्थित मुक्ति चौकदेखि बुधबारेसम्मको सडकको स्तरोन्नति गरिने भएको छ । मुक्ति चौकदेखि उत्तर महानन्द चौकसम्म चार लेन र बाँकी सडकलाई दुई लेनमा स्तरोन्नति गरिन लागेको हो ।
स्तरोन्नति गरिने सडक बिर्तामोडस्थित मुक्ति चौकबाट उत्तर शनिश्चरे रोडबाट कप्तानबारी चौक पूर्व पुष्पलाल चौक हुँदै बिहीबारे हाट, खरबन्दी, बुद्धचोक, कालिस्थान बजार हुँदै बुद्धशान्ति–२ जयपुर–बुधबारे सडकसम्म रहने बताइएको छ ।
२५ करोड रुपैयाँको लागतमा सडकको स्तरोन्नति गरिन लागेको हो । सडक निर्माणका लागि शान्ति निर्माण सेवा बिर्तामोड–२ ले ठेक्का लिएको र सडक सर्बेको काम भइरहेको जानकारी शान्ति निमार्ण सेवाका सञ्चालक फणिन्द्र तिम्सिना दिएका छन् ।
सडक निर्माणका लागि दुई महिना अघि नै सम्झौता भएको र बर्षाका कारण सडक निर्माणमा ढिलाइ भएको निर्माण सेवाका सञ्चालक तिम्सिनाले बताए । उनले भने ‘सडक डिभिजन कार्यालयले सर्बे सकेलगत्तै हामी पनि सर्बे गर्छाै र तत्काल सडकको स्तरोन्नति गर्नेछौँ ।’
झापा क्षेत्र नं. २ बाट निर्वाचित प्रतिनिधि सभा सदस्य पवित्रा निरौला खरेलको पहलमा निर्वाचन क्षेत्र अन्तर्गत रणनीतिक सडकका रुपमा मुक्ति चौकदेखि बुधबारेसम्मको सडकको स्तरोन्नति गर्न लागिएको हो । भदौको दोस्रो साताबाट सो सडकको स्तरोन्नति गर्ने भनिए पनि बर्षाका कारण समस्या देखिएकाले सडक निर्माणमा ढिलाइ भएको प्रतिनिधिसभा सदस्य निरौलाका स्वकीय सचिव लीला आचार्यले बताए ।
