काठमाडौं । सेयर बजार परिसूचक नेप्सेमा नकारात्मक सर्किट लाग्दा ४० मिनेटको लागि कारोबार रोकिएको छ ।
आइतबार कारोबार सुरु भएको पहिलो दुई घण्टा बजार परिसूचक नेप्सेमा ५ प्रतिशतको गिरावट हुँदा ४० मिनेटको लागि कारोबार रोकिएको हो ।
बजार खुलेको पहिलो घण्टाभित्र नेप्से ४ प्रतिशतले घटबढ भएमा २० मिनेट, दोस्रो घण्टाभित्रमा ५ प्रतिशतले नेप्से घटबढ भएमा ४० मिनेट र नेप्सेमा ६ प्रतिशतको घटबढ भएमा उक्त दिनको लागि कारोबार रोकिन्छ । नेप्से खुलेको दोस्रो घण्टाभित्रमा ५ प्रतिशतको गिरावट हुँदा ४० मिनेटको लागि कारोबार रोकिएको हो ।
नेप्सेमा सर्किट लाग्दासम्म बजारमा एक करोड ४८ लाख ३१ हजार ७३८ कित्ता सेयर कारोबार हुँदा सात अर्ब १९ करोड ९० लाख ३६ हजार रुपैयाँको कारोबार भएको छ । नेप्सेमा १८५ कम्पनीको सेयर कारोबारमा आउँदा १८३ कम्पनीको मूल्य घटेको छ भने दुई कम्पनीको मूल्य मात्रै बढेको छ ।
नेप्सेमा सबै उपसूचकमा गिरावट हुँदा वित्त कम्पनी र विकास बैंक उपसूचक ९ प्रतिशतभन्दा माथिले घटेको छ । आज कारोबारमा आएकामध्ये तीन दर्जन कम्पनीको मूल्य नकारात्मक सर्किट लेभलमा रहेको छ ।
