झापा । झापाको भद्रपुरस्थित मेची अस्पतालमा पीसीआर परीक्षण गर्न रिएजेन्ट अभाव भएपछि विराटनगरस्थित कोशी अस्पतालमा परीक्षणको भार थपिएको छ ।
मेची अस्पतालमा दैनिक तीन सयसम्म स्वाव परीक्षण गर्दै आएको थियो, तर रिएजेन्ट सकिएका कारण विगत तीन दिनदेखि बाहिरको स्वाब संकलन बन्द गरिएको सो अस्पतालका मेसु पिताम्बर ठाकुरले जानकारी दिए ।
मेचीमा परीक्षण बन्द भएपछि विराटनगरस्थित कोशी अस्पतालमा दैनिक ४ सय परीक्षणको भार थपिएको छ । यसरी स्वाव परीक्षणको भार थपिदा पीसीआर संकलन गरेकोे रिपोर्ट आउन समय लाग्ने गरेको कोशी अस्पतालका मेसु चुमनलाल दाशले जानकारी दिए ।
उनले प्रादेशिक प्रयोग शाला विराटनगरले पनि थोरै मात्रामा पीसीआर संकलन गर्न थालेको र प्रदेश १ मा रहेका ४ वटा सरकारी ल्याबहरुमा संकलनमा कमी आएका कारण कोशी अस्पतालमा परीक्षणका लागि ल्याइएका स्वाब ५ दिनदेखि लाइनमा रहेको बताए ।
यता सामाजिक विकास मन्त्री उषाकला राईले भने मेची अस्पतालको लागि तुरुन्तै रिएजेन्ट पठाउने तयारी भएको बताइन् । उनले पीसीआर परीक्षण बन्द नगर्न अस्पताललाई निर्देशन समेत दिएकी छन् ।
प्रदेश १ का १४ जिल्लाबाट दैनिक ३ हजार २ सय स्वाब संकलन हुने गरेको छ भने २७ सयसम्म परीक्षण हुने गरेको छ । प्रदेश १ का निजी, सामुदायिक र सरकारी गरी १२ वटा प्रयोग शालामा स्वाब परक्षिण हुदै आएको छ ।
पहाडी जिल्लामा धनकुटा जिल्ला अस्पतालमा मात्र स्वाब परीक्षण गर्ने गरिन्छ । पूर्वी पहाडी जिल्लाहरुबाट सवै स्वाब संकलन गरेर मेची अस्पताल, कोशी अस्पताल, प्रदेश जनस्वास्थ्य प्रयोगशाला विराटनगर र धरानस्थित वीपी कोइरालामा आउने गरेको सामाजिक विकास मन्त्रालयले जानकारी दिएको छ ।
