जिल्ला प्रहरी कार्यालय झापाले जिल्लामा भयावह बन्दै गएको लागूऔषधको समस्यालाई समाधान गर्न लागूऔषधविरुद्ध झापा अभियान सञ्चालन गरेको छ ।
लागूऔषधको समस्या विकराल बनेपछि जिल्ला प्रहरी कार्यालय झापाले स्थानीय तहसँग सहकार्य गर्ने गरी शनिबारदेखि लागूऔषधविरुद्ध झापा अभियान सञ्चालन गरेको हो ।
बिर्तामोड नगरपालिकासँगको सहकार्यमा आयोजित उद्घाटन कार्यक्रममा अभियानको उद्घाटन कार्यक्रमका प्रमुख अतिथि तथा कोशी प्रदेशका मुख्यमन्त्री हिक्मतकुमार कार्की र प्रहरी महानिरीक्षक दानबहादुर कार्कीले गरेका हुन् । अभियानको उद्घाटन समारोहमा जिल्लाका सरोकारवाला संस्थाका प्रमुख तथा प्रतिनिधिहरुको उपस्थिति उपस्थिति रहेको थियो ।
लागूऔषधको देशभरिकै ट्रान्जिट पोइन्ट बनेको झापाका कुनै पनि पालिका लागूऔषधको समस्याबाट अछुतो नरहेको बताइएको छ । लागूऔषधबाट सबैभन्दा बढी प्रभावित मेचीनगर, भद्रपुर, बिर्तामोड र दमक रहेका छन् ।
तीन वटा रणनीतिसहित जिल्ला प्रहरी कार्यालयले सुरु गरेको लागूऔषधविरुद्ध झापा अभियानअन्तर्गत मुख्य गरेर पाँच प्रकारका कार्यक्रम सञ्चालन गरिने भएको छ । पहिलो कार्यक्रम पोस्टरिङ रहेको छ । पोस्टरिङ क्याम्पियनअन्तर्गत पालिकाभित्रका सबै विद्यालयहरुमा टाँस्नका लागि जनप्रतिनिधिहरुलाई पोस्टर दिइने भएको छ ।
त्यस्तै दोस्रो कार्यक्रम टीच द टिचर्स रहेको छ । विद्यार्थीहरुलाई सचेत बनाउने कडी शिक्षकहरु भएकाले लागूऔषधविरुद्ध सचेतना जगाउन शिक्षकहरुको सहयोग लिइने भएको छ । लागूऔषधविरुद्धको कक्षा सञ्चालन गर्न १५० जना शिक्षकलाई तालिम दिई खटाइने भएको छ ।
तेस्रो कार्यक्रम फुटबल पार्टनरसीप रहेको छ । युवा लक्षित त्यस कार्यक्रमअन्तर्गत पाँचवटा मैत्रीपूर्ण फुटबल प्रतियोगिता गराइने भएको छ । चौथो कार्यक्रमलाई जान क्लब नाम दिइएको छ । त्यसअन्तर्गत राजनीतिक दल, सामाजिक संघसंस्था र नागरिक समाजको सहयोग लिइने भएको छ ।
जिल्ला प्रहरी कार्यालय झापाका प्रमुख प्रहरी उपरीक्षक बसुन्धरा खड्काले हाल जिल्लामा लागूऔषधको अवस्था र चुनौतीका विषयमा जानकारी दिएकी थिइन् ।
