झापाको बिर्तामोड नगरपालिका-५ अन्तर्गत रहेको सुन्दर मार्ग रोड नं.१ लाई व्यवस्थित र स्तरोन्नति गर्ने अभियानले सकारात्मक मोड लिएको छ ।
समितिका अध्यक्ष घनश्याम निरौलासहित स्थानीयवासीहरूको टोलीले बुधबार बिर्तामोड नगरपालिका-५ का वडाध्यक्ष रोहित प्रसाईं समक्ष औपचारिक रूपमा निवेदनपत्र बुझाएका छन् ।
निवेदनमार्फत उक्त सडक क्षेत्रमा नाला निर्माण तथा पेबल बिछ्याउने कार्यका लागि आगामी आर्थिक वर्षको बजेटमा योजना समावेश गरिदिन अनुरोध गरिएको छ । स्थानीयको आवश्यकतालाई गम्भीरतापूर्वक लिँदै वडाध्यक्ष प्रसाईंले पनि यस विषयमा सकारात्मक चासो देखाउँदै आगामी बजेटमा योजना समेट्न आवश्यक पहल गर्ने प्रतिबद्धता जनाएका छन् ।
वर्षौंदेखि स्थानीयवासीले प्रयोग गर्दै आएको यस सडकमा नाला र स्तरीय सडकको अभावका कारण वर्षायाममा विशेष गरी आवतजावतमा समस्या हुने गरेको छ। यही समस्याको स्थायी समाधानका लागि स्थानीयहरू एकजुट भएर विकास निर्माणको माग लिएर वडा कार्यालय पुगेका हुन् ।
समितिका अध्यक्ष निरौलाले स्थानीयको आवश्यकता र जनप्रतिनिधिको सकारात्मक सोच एक ठाउँमा आए विकासका कामले गति लिने विश्वास व्यक्त गरे । उनले सुन्दर मार्ग रोड नं.१ लाई व्यवस्थित, सुरक्षित र नमुना सडकका रूपमा विकास गर्न सबै पक्षको सहकार्य आवश्यक रहेको बताएका छन् ।
