झापाको विभिन्न स्थानमा गएराती आएको हावाहरीका कारण ठूलो क्षति पुगेको छ ।
बिर्तामोड तथा आसपासका क्षेत्रमा अविरल वर्षासँगै आएको हावाहुरीले विभिन्न स्थानमा व्यापक क्षति पुर्याएको छ ।
हावाहुरीका कारण विद्युतका पोल ढल्नुका साथै घर, गोठ तथा सार्वजनिक संरचनामा क्षति पुगेको जिल्ला प्रहरी कार्यालय झापाले जनाएको छ ।
इलाका प्रहरी कार्यालय अनारमनी तथा मातहत प्रहरी युनिटका अनुसार बिर्तामोड नगरपालिका वडा नं.३ विराट आदर्श टोल स्थित भित्री सडकमा बिजुलीको पोल ढल्दा सडक अवरुद्ध भएको थियो । सोही क्षेत्रमा रोहित खड्काको टिनको छानो भएको घरमा पीपलको रुख ढल्दा आंशिक क्षति पुगेको छ ।
त्यस्तै नगरपालिका भवनको ग्राउण्ड फ्लोरमा आल्मुनियमबाट निर्माण गरिएको कोठाको बार तथा झ्यालढोका पूर्ण रूपमा क्षति भएको प्रहरीले जनाएको छ ।
बिर्तामोड-३ स्थित ऐतिहासिक विराटपोखरी परिसरमा रहेको ठूलो पीपलको रुख ढल्दा नजिकै रहेको मन्दिरको आधा भागमा समेत क्षति पुगेको छ ।
त्यसैगरी बिर्तामोड-८ त्रिवेणीचोक क्षेत्रमा दुई वटा बिजुलीका पोल ढल्दा सडक अवरुद्ध भएको छ भने बिर्तामोड-६ स्यालडाँगी क्षेत्रमा चार वटा र स्टाफ चोक क्षेत्रमा एक वटा विद्युत पोल ढलेका छन् । वडा नं.९ चन्द्रमार्ग क्षेत्रमा समेत पोल ढल्दा सडक अवरुद्ध भएको प्रहरीले जनाएको छ ।
हावाहुरीका कारण बिर्तामोड-७ तेत्रीडाँगी तथा म्यावारी क्षेत्रमा स्थानीयवासीका घर तथा गोठमा ठूलो क्षति पुगेको छ । सन्चध्वज पाङ्धाकको सुँगुरको खोर तथा घरमा ठूलो क्षति भएको छ भने गोपाल अधिकारी, कुमार अधिकारी, दिवस ढकाल लगायतका घरमा समेत क्षति पुगेको छ ।
हेमबहादुर बस्नेतको गोठ तथा घरको छानो उडेर करिब ३०० मिटर टाढासम्म पुगेको प्रहरीले जनाएको छ । साथै लत्तन राजवंशी, श्याम चौधरी, चैतु मियाँ र सेलेमा खातुनका घरको छानो उडाएर क्षति पुर्याएको छ ।
त्यस्तै बाह्रदशी गाउँपालिका-५ मागुगाउँ निवासी पृथ्विलाल राजवंशीको टिनको छानो भएको घरको छानो पूर्ण रूपमा उडाउँदा करिब एक लाख ५० हजार रुपैंया बराबरको क्षति भएको प्रारम्भिक अनुमान गरिएको छ ।
यसैबीच बिर्तामोड-६ बुसाबारी, खालवारी (राई गाउँ) तथा बुट्टाबारी-पाख्रेल सडक खण्ड क्षेत्रमा विद्युतका पोलहरू भाँचिएर क्षति पुगेको छ । नेपाल विद्युत प्राधिकरण बिर्तामोड-अनारमनी वितरण केन्द्र अन्तर्गत अधिकांश क्षेत्रमा विद्युत सेवा अवरुद्ध भएको छ भने विभिन्न इन्टरनेट सेवा प्रदायक कम्पनीहरूको सेवा समेत प्रभावित बनेको छ ।
त्यस्तै मेचीनगरमा समेत हावाहुरीका कारण क्षति पुगेको र हाल क्षतिको विवरण संकलनको काम भइरहेको प्रहरीले जनाएको छ । हाल प्रहरी टोली परिचालन गरी उद्धार, समन्वय, क्षतिको विवरण संकलन, सडक सुचारु तथा विद्युत सेवा पुन: सञ्चालन गराउने कार्य भइरहेको प्रहरीले जनाएको छ ।
