शनिबार दिउँसो हलुवागढ सामुदायिक वन अफिस परिसरको माहोल भिन्न थियो । मानिसहरूको जमघट हेर्दा लाग्थ्योकि केही अप्रिय घटना भए जस्तो तर वास्तवमा उक्त भिड अरु केही नभएर रेगन प्रसाईंद्वारा निर्देशित हाम्रो सामुदायिक वन लघु चलचित्र हेर्नेको थियो ।
झापाको अर्जुनधारा-१ स्थित हलुवागढ सामुदायिक वनमा छायांकन गरिएको चलचित्र आज एक कार्यक्रमबीच सोही स्थानमा प्रदर्शन गरिएको हो ।
हलुवागढ सामुदायिक वनका अध्यक्ष चक्रबहादुर तामाङको अध्यक्षतामा भएको प्रदर्शन समारोहको प्रमुख अतिथि अर्जुनधारा-१ का कार्यवाहक वडाध्यक्ष दिनेश घिमिरे रहेका थिए ।
उक्त अवसरमा बोल्दै प्रमुख अतिथि घिमिरे र शनिश्चरे प्रहरी कार्यालयका प्रमुख नवराज केसी लगायतले चलचित्रले वन सम्बन्धि राम्रो सन्देश दिएको प्रतिक्रिया दिएका थिए ।
उक्त चलचित्र कोशी प्रदेशका विभिन्न जिल्लाहरुमा प्रदर्शन गरिने निर्देशक रेगन प्रसाईंले जानकारी दिए ।
लोकनाथ ढकालले संयोजन गरेको विशेष प्रदर्शन हेर्न विभिन्न संघसंस्थाका प्रतिनिधि तथा स्थानीयको बाक्लो उपस्थिति रहेको थियो ।
लेखक कृष्ण अनमोलले चलचित्रका विषयमा प्रष्ट पारेको कार्यक्रमको सञ्चालन सञ्चारकर्मी सोफिया खड्काले गरेकी थिइन् ।
कृष्ण अनमोलको पटकथा रहेको चलचित्रको छायांकन तथा सम्पादन ज्ञानेन्द्र कोइराला र तिलक रिजालले गरेका हुन् ।
अभिषेक प्रसाईं, चक्रबहादुर तामाङ र मनिका आचार्य निर्माता रहेको चलचित्रमा दिलिपकुमार योङहाङ (हिलिहाङ), ज्ञानु कोइराला, उमेश पौडेल, ज्ञानु श्रेष्ठ, तुलविक्रम तामाङ, धनुष महतो, मथुरा तामाङ, मनिका आचार्य, चक्रबहादुर तामाङ, गोपी पौडेल (झापाली टुपी), रमा भट्टराई, सुदिप खवास, सुलभ तामाङ, नरेन्द्र उप्रेती, दिपक थेगिम, सुमन इक्रास, लोकनाथ ढकाल, अनिता अधिकारी आचार्य, टङ्क बराल, महेन्द्र आचार्य, गोपाल खड्का र खुसी विश्वकर्मा लगायतको भुमिका रहेको छ ।
