गोदावारी एल्मुनाई एसोसिएसनको पहलमा हल्दीबारी गाउँपालिका वडा नं.३ का तीन सामुदायिक विद्यालयमा विद्यार्थी पोशाक वितरण गरिएको छ ।
लक्ष्मी माध्यमिक विद्यालयको प्राङ्गणमा आयोजित कार्यक्रममा श्री पञ्चायत माध्यमिक विद्यालय, श्री लक्ष्मी माध्यमिक विद्यालय र दिपेन्द्र आधारभूत विद्यालयका गरी ४२५ जना विद्यार्थी पोशाकबाट लाभान्वित भएका हुन् ।
लक्ष्मी माध्यमिक विद्यालय व्यवस्थापन समितिका अध्यक्ष विष्णु तामाङको अध्यक्षतामा भएको कार्यक्रममा प्रमुख अतिथि तथा वडा नं.३ का वडाध्यक्ष विष्णुप्रसाद ओली, गोदावारी एल्मुनाई एसोसिएसनका अध्यक्ष प्रकाश बाबु केसी, विद्यालयका प्रधानाध्यापक रामप्रसाद घिमिरे, डिल्लीराम ढुङ्गेल र अर्जुन भट्टराई लगायतले आ-आफना धारणा राखेका थिए ।
कार्यक्रममा संस्थाका कार्यकारी सदस्यहरू निर्मल कृष्ण श्रेष्ठ, सिकन्दर सिंह थापा, आयुष श्रेष्ठ, आयुष अधिकारी र विनोद दाहाल, लक्ष्मी माध्यमिक विद्यालय शिक्षक-अभिभावक संघकी अध्यक्ष सुनिता महतो, स्थानीय जनप्रतिनिधि, शिक्षक, विद्यार्थी तथा अभिभावकहरूको उल्लेखनीय सहभागिता रहेको थियो ।
कार्यक्रममा श्री पञ्चायत माध्यमिक विद्यालयलाई १२० सेट, दिपेन्द्र आधारभूत विद्यालयलाई १०० सेट र लक्ष्मी माध्यमिक विद्यालयलाई २०५ सेट पोशाक हस्तान्तरण गरिएको थियो ।
विद्यालयका सहायक प्रधानाध्यापक मदन पोख्रेल स्वागत गरेको कार्यक्रमको सहजीकरण शिक्षक बोधकृष्ण पौडेलले गरेका थिए ।
