विभिन्न समयमा विविध कार्यक्रमहरू आयोजना गर्दै आइरहेको झापाली समाज ओमानले यसपटक भने केही फरक कार्यक्रम गर्ने उद्देश्यले प्रथम अन्तर-नेपाली फुटसल प्रतियोगिता सम्पन्न गरेको छ ।
१६ वटा टिमहरूको सहभागिता रहेको प्रतियोगितामा फाइनल खेल रोयल मस्कट र किरात समाज ओमानबीच सम्पन्न भएको थियो ।
फाइनलमा किरात समाज ओमानलाई स्तब्ध पार्दै रोयल मस्कटले उपाधि हासिल गर्दै मेडल, ट्रफी तथा नगद पुरस्कार जित्न सफल भएको झापाली समाज ओमानका कोषाध्यक्ष शेखर खतिवडाले जानकारी दिए ।
समापन कार्यक्रमका प्रमुख अतिथि महामहिम राजदूत डोरनाथ आर्यालले पुरस्कार वितरण गर्नुका साथै बधाई तथा शुभकामना मन्तव्य व्यक्त गरेका थिए ।
उक्त अवसरमा नेपाली सोशल क्लब ओमानका अध्यक्ष सुरेश खड्का तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको थियो ।
झापाली समाज ओमानका खेलकुद संयोजक कर्मा शेर्पाले प्रतियोगितालाई सहयोग गरी सफल बनाउन योगदान पुर्याएका सम्पूर्ण प्रायोजकहरूलाई धन्यवाद व्यक्त गरेका थिए ।
