निजी तथा आवासीय विद्यालय अर्गनाइजेसन नेपाल (प्याब्सन) झापाको आयोजनामा बिर्तामोड नगरस्तरीय सांस्कृतिक गायन तथा नृत्य प्रतियोगिता सुरु भएको छ ।
प्रतियोगिता शनिबार बिर्तामोड नगरपालिका-१० स्थित विष्णु भगवती अङ्ग्रेजी माध्यमिक विद्यालयको प्राङ्गणमा सुरु भएको हो ।
प्याब्सन बिर्तामोड नगर समितिका अध्यक्ष सुरेन्द्र खरेलको अध्यक्षतामा भएको उद्धाटन समारोहको प्रमुख अतिथि बिर्तामोड-१० का वडाध्यक्ष एवम बिर्तामोड नगरपालिकाका कार्यवाहक नगरप्रमुख दुर्योधन गुरुङ रहेका थिए ।
प्रतियोगिता अन्तर्गत कक्षा ११-१२ का विद्यार्थीबीच गायन प्रतियोगिता, अन्डर-१२ गायन तथा कक्षा १० सम्मका विद्यार्थीबीच नृत्य प्रतियोगिता सञ्चालन गरिएको छ ।
प्रतियोगितामा सहभागी विद्यार्थीहरूले नेपाली संस्कृति झल्किने भेषभूषामा सन्देशमूलक गायन तथा नृत्य प्रस्तुत गर्दा कार्यक्रम स्थल भावनात्मक बनेको थियो ।
प्याब्सनको वार्षिक क्यालेन्डर अनुसार यस वर्ष यसअघि खेलकुद महोत्सव तथा एसईई कार्यक्रम सम्पन्न भइसकेको र सोही कार्यक्रमअन्तर्गत सांस्कृतिक प्रतियोगिता आयोजना गरिएको प्याब्सन बिर्तामोड नगर समितिका अध्यक्ष खरेलले जानकारी दिए ।
उनका अनुसार विद्यार्थीभित्र लुकेका अन्तरनिहित प्रतिभालाई प्रस्फुटन गराउँदै सक्षम, सुसंस्कृत र सबल समाज निर्माण गर्नु कार्यक्रमको मुख्य उद्देश्य रहेको छ ।
कार्यक्रममा बोल्दै प्रमुख अतिथि गुरुङले सामुदायिक र संस्थागत विद्यालयबीच विभेद गर्नु नहुने बताउँदै निजी विद्यालयहरूले गुणस्तरीय शिक्षा प्रदान गर्दै आएको कारण अभिभावकको आकर्षण बढ्दै गएको उल्लेख गरेका थिए ।
प्रथम, द्वितीय र तृतीय हुने विद्यार्थीले मेडल, ट्रफी र प्रमाणपत्र प्राप्त गर्ने प्याब्सन नगर सदस्य दीपक चम्लागाईंले जानकारी दिए ।
कार्यक्रममा प्याब्सन महाधिवेशन प्रतिनिधि एजाज अहमद अन्सारी, निदि माध्यमिक विद्यालयका प्रधानाध्यापक रञ्जित शाह, इडन गार्डेन अङ्ग्रेजी विद्यालयका प्रधानाध्यापक मोहन आचार्यलगायत विभिन्न शैक्षिक संघसंस्थाका प्रतिनिधि, शिक्षक-शिक्षिका, अभिभावक तथा पत्रकारहरूको उल्लेखनीय उपस्थिति रहेको थियो ।
कोषाध्यक्ष प्रमिला बजगाईले स्वागत गरेको उद्धाटन समारोहको सञ्चालन सचिव दिपंकर मैनालीले गरेका थिए ।
