झापाको बिर्तामोड-५ मा अवस्थित न्युटन्स एजुकेशन एकेडेमीको २२ औँ वार्षिक विद्यालय खेलकुद प्रतियोगिता सम्पन्न भएको छ ।
विद्यालय व्यवस्थापन समिति अध्यक्ष धर्मा पराजुली प्रसाईंको अध्यक्षतामा भएको कार्यक्रमको प्रमुख अतिथि बिर्तामोड नगरपालिकाका शिक्षा शाखा अधिकृत लासाङ तामाङ रहेका थिए ।
उक्त अवसरमा मन्तव्य राख्दै प्रमुख अतिथि तामाङले विद्यार्थीहरूको सर्वाङ्गीण विकासमा खेलकुदको भूमिका अत्यन्त महत्वपूर्ण रहेको उल्लेख गर्दै शैक्षिक अध्ययनसँगै शारीरिक र मानसिक विकासका लागि खेलकुद आवश्यक रहेको बताए ।
विद्यालयका प्रिन्सिपल देवेन्द्र हुमागाईले खेलकुदले विद्यार्थीहरूमा अनुशासन, सहकार्य, प्रतिस्पर्धा भावना तथा नेतृत्व क्षमताको विकासमा मद्दत गर्ने बताउँदै विद्यालयले सिकाई सँगसँगै अतिरिक्त क्रियाकलापलाई पनि महत्व दिँदै आएको जानकारी दिए ।
कार्यक्रममा हिसान झापाका कार्यवाहक अध्यक्ष उत्तम खनाल, कोषाध्यक्ष रञ्जित शाह, बालबालिका तथा शिक्षा सञ्चार मञ्चका संयोजक सरोज पौडेल, बिर्तामोडमा सञ्चालित रहेका आठ वटा मन्टेश्वरीका सञ्चालक तथा प्रिन्सिपल लगायतको उपस्थिति रहेको थियो ।
“खेलकुद र तन्दुरुस्ती सक्रिय जीवनको मसला हो” भन्ने मूल नारासहित सम्पन्न प्रतियोगितामा कक्षा १ देखि ५ सम्मका विद्यार्थीहरूले विभिन्न एथलेटिक्स खेलहरू प्रस्तुत गरेका थिए । खेलकुद अन्तरगत १०० मिटर रिले दौड, हाईजम्प, लङजम्प लगायतका विभिन्न विधागत प्रस्तुतीहरु समावेश थिए ।
विद्यालयका डाइरेक्टर आशिष प्रसाईंले स्वागत गरेको कार्यक्रममा उत्कृष्ट प्रदर्शन गर्ने विद्यार्थीहरूलाई पुरस्कार तथा प्रमाणपत्र प्रदान गरिएको थियो ।
