अपाङ्गता भएका अनाथ र टुहुरा बालबालिकाहरुको पालनपोषणमा जुटेको मेचीनगरको एउटा सामाजिक संस्थाले खर्च धान्न समस्या भएको बताएको छ ।
झापाको मेचीनगर नगरपालिका वडा नं.७ मा रहेको सामाजिक संस्था समाज सेवा सुधार युवा संघ अपाङ्ग सहयोग समितिको पाँच कठ्ठा जग्गामा तीन तले भवनमा हाल १६ जना अपाङ्गता भएका अनाथ तथा टुहुरा बालबालिकाहरु बस्ने गर्छन् ।
उनीहरुलाई उक्त संस्थाले पालनपोषण र पढ्नदेखि सबै कुराको व्यवस्था गरिदिएको छ । वि.सं.२०६० सालमा स्थापना भएको संस्थामा मेचीनगरसहित विभिन्न जिल्लाका २० जना मध्ये हाल १६ जनामा १० जना बालक र ६ जना बालिका रहेको समाज सेवा सुधार युवा संघ अपाङ्ग सहयोग समितिका उपाध्यक्ष गंगाप्रसाद संग्रौलाले जानकारी दिए ।
उनीहरु उदयपुरको त्रियुगा नगरपालिका, ताप्लेजुङ, सुनसरीको इटहरी, भद्रपुर र मेचीनगर नगरपालिकाका अपाङ्गता भएका अनाथ र टुहुरा बालबालिकाहरु हुन् ।
संस्थामा बुबा-आमा नभएका, अपाङ्गता भएर ल्याएका, कोहि विचल्लीमा परेका लगायतका बालबालिकाहरु छन् । प्राय: कोहि पनि प्रष्ट बोल्न सक्ने अवस्थाका छैनन् ।
उनीहरुमध्ये सात जना स्थानीय सरस्वती आधारभूत विद्यालयमा पढ्ने गरेको संग्रौलाले बताए । उनका अनुसार अन्य बाँकी रहेकालाई संस्थामा नै शिक्षकका रुपमा राजेश गुरागाईले पढाउने गरेका छन् ।
संस्थामा दुई जना कर्मचारीमा शिक्षक गुरागाई र अर्का कर्मचारी अम्बिका पोखरेल बालबालिकाको सेवामा खटिएका छन् । बालबालिकाको पालनपोषण, कर्मचारी र संस्थाको व्यवस्थापनका लागि मेचीनगर नगरपालिकाले बर्षेनि ५ लाख रुपैयाँ बजेट दिने गरेको समाज सेवा सुधार युवा संघ अपाङ्ग सहयोग समितिका अध्यक्ष धर्मराज घिमिरेले बताए ।
