झापाको मेचीनगर-१२ मा आयोजित दोस्रो वडाध्यक्ष कप जुनियर कराँते प्रतियोगिताको उपाधि बडाखाल डोजोले हात पारेको छ ।
त्यस्तै प्रतियोगितामा दोस्रो स्थान बासबारी डोजोले प्राप्त गर्दा तेस्रो स्थान बुधबारे डोजोले हासिल गरेको छ ।
नेपाल कराँते सहरेडाँगी डोजोको आयोजनामा र मेचीनगर-१२ वडा कार्यालयको सहकार्यमा शनिबार भएको प्रतियोगितामा झापाका विभिन्न डोजोका झन्डै ३ सय खेलाडी सहभागी भएका थिए ।
२० केजी तौल समूहदेखि ५० केजी तौल समूहसम्मका विभिन्न उमेर समूहका खेलाडीहरूबीच प्रतिस्पर्धा भएको थियो ।
प्रतियोगितामा उत्कृष्ट महिला खेलाडी (बेष्ट लेडी) चारआली डोजोकी ओजेसी खनाल घोषित भइन् भने उत्कृष्ट पुरुष खेलाडी (बेष्ट ब्वाइ) बुधबारे डोजोका विलप दाहाल बनेका छन् ।
नेपाल कराँते सहरेडाँगी डोजोका अध्यक्ष किरण कुमार विश्वकर्माको अध्यक्षतामा भएको कार्यक्रमका प्रमुख अतिथि मेचीनगर-१२ का वडाध्यक्ष मधुसूदन निरौला तथा विशिष्ट अतिथि मेचीनगर-१४ का वडाध्यक्ष बाबुलाल सुब्बाले खेलकुदले समाजमा सकारात्मक सोच र समावेशिता ल्याउने उल्लेख गर्दै सहभागी खेलाडीहरूलाई बधाई तथा शुभकामना दिए ।
डोजोकी उपाध्यक्ष कमला लिम्बूले मन्तव्यबाट स्वागत गरेको कार्यक्रमको सञ्चालन प्रतियोगिता आयोजक समितिका सचिव आइदेव राईले गरेका थिए ।
