सशस्त्र प्रहरी बल नेपाल नं २ गण हे.क्वा.झापाले १८ औं स्थापना दिवस मनाएको छ।
सशस्त्र प्रहरी बल, नेपाल नं.१ बराह बाहिनी मुख्यालय सुनसरीका बाहिनीपति सशस्त्र प्रहरी नायव महानिरीक्षक कुमार न्यौपानेको प्रमुख आतिथ्यमा बिहीबार गण परिसरभित्र स्थापना दिवस मनाइएको हो ।
उक्त अवसरमा कर्तव्यपालनाको सिलसिलामा दिवंगत भएका स्व.सोमबहादुर तामाङको परिवारलाई विशेष सम्मानसहित ५१ हजार नगद प्रदान गरिएको थियो ।
त्यस्तै प्रमुख अतिथि लगायतहरुबाट बैशाख महिनामा उत्कृष्ट हुने मासिक जवान लगायत अन्य क्रियाकलाप तथा खेल विधामा प्रथम हुने कमर्चारीहरुलाई सम्मानका साथै प्रशंसापत्र प्रदान गरिएको थियो ।
त्यस अवसरमा बोल्दै प्रमुख अतिथि बाहिनीपति न्यौपानेले सशस्त्र प्रहरी बल नेपालले जुनसुकै अवस्थामा आइपरेका कठिनाइ र चुनौतीपूर्ण परिस्थितिमा समेत कुशलतापूवर्क जिम्मेवारी निर्वाह गरेको बताए । सीमा सुरक्षा र अवैध गतिविधि रोकथामका लागि सशस्त्र प्रहरी बल नेपालको विशेष योगदान रहेको उनले बताएका थिए ।
कार्यक्रममा सशस्त्र प्रहरी बल, नेपाल नं.२ गण हे.क्वा.झापाका गणपति सशस्त्र प्रहरी उपरीक्षक तुलबहादुर भण्डारीले “सीमावासीसँग सशस्त्र प्रहरी“ कार्यक्रमको अवधारणाअनुरुप झापा जिल्लास्थित चार स्थानमा खानेपानी व्यवस्थापन, धार्मिक तथा पर्यटकीय स्थलमा सरसफाई तथा सरसफाईजन्य सामग्री वितरण, सीमाबासी लक्षित २० जना स्थानीय युवाहरुलाई सीपमूलक (ईलेक्ट्रिसियन) तालिम सञ्चालन गरेको बताए ।
उनले सीमा इलाकामा बसोबास गर्ने अति बिपन्न परिवारकी बुवा आमा समेत गुमाएकी गौरीया प्रा.वि.मा अध्ययनरत १० वर्षीया छात्रा रानी ऋषिदेवलाई नेपाल एपिएफ स्कुल सप्तरीमा कक्षा १२ सम्म अध्ययन छात्रावृति प्रदान गरिएको जानकारी दिए ।
मेचीनगर र गौरीगंजमा गरी दुई स्थानमा नि:शुल्क स्वास्थ्य शिविर सञ्चालन गरिसकेको र यस्ता कार्यक्रमहरु अझ प्रभावकारी ढंगबाट गर्दै जाने उनले प्रतिवद्धता व्यक्त गरेका थिए ।
