पूर्वपश्चिम राजमार्गको पूर्वीखण्डमा निर्माणाधीन एशियन हाइवेमा डाइभर्सनको काम मनसुन सुरू हुनु अगावै सम्पन्न गरिसक्न काँकडभिट्टा-लौकही सडक योजना कार्यालय (पूर्वी खण्ड) झापाले निर्देशन दिएको छ ।
एशियाली विकास बैंकको सहयोगमा १० अर्ब रुपैयाँको लगानीमा एशियन हाइवेको स्तरोन्नति भइरहेको छ । सडक निर्माणमा ढिलासुस्ती भइरहेको र वर्षातमा यातायात नै अवरुद्ध हुन सक्ने जोखिम छ । अहिलेसम्म सडक निर्माणमा १९ प्रतिशत र पुल कल्भर्ट निर्माणमा १७ प्रतिशत मात्र भौतिक प्रगति छ ।
निर्माणसम्बन्धी ठेक्का लिएको कम्पनीलाई डाइभर्सनको काम चाँडो सक्न पत्राचारमार्फत निर्देशन दिइएको दमक कार्यालयका आयोजना प्रमुख ई.सुनिलबाबु पन्तले बताए ।
काममा ढिलासुस्ती भएको र वर्षा सुरु भएपछि सडक निर्माणका क्रममा बनाइएका डाइभर्सन बाढीले बगाएर यातायातसमेत अवरुद्ध हुन सक्ने जोखिम बढेकाले डाइभर्सनको काम छिटोभन्दा छिटो सक्न आवश्यक रहेको उनको भनाइ छ ।
