झापाको कनकाई नगरपालिकाले नगरलाई बालमैत्री नगर घोषणा गरेको छ ।
नगरको १२ औं स्थापना दिवसको अवसर पारेर बिहीबार एक समारोहकाबीच बालमैत्री स्थानीय शासनयुक्त तथा खोप सुनिश्चितता नगर घोषणा गरिएको हो ।
“सुनिश्चित बालमैत्री वानी व्यवहार सुखी र समृद्ध कनकाईको आधार बालमैत्री नगरको दिगोपनका लागि सबै जुटौं, कोही नछुटौं” भन्ने नाराका साथ नगरलाई बालमैत्री नगर घोषणा गरिएको हो ।
कनकाई नगर प्रमुख राजेन्द्रकुमार पोखरेलको अध्यक्षतामा भएको कार्यक्रममा बालमैत्री नगर घोषणा कार्यक्रमको उद्घाटन प्रमुख अतिथि तथा कोशी प्रदेशका खानेपानी तथा सिंचाइ मन्त्री एकराज कार्कीले गरेका थिए ।
सरकारले निर्धारण गरेको ५१ वटा सूचकमा दुई स्थानीय सूचक थप गरी कुल ५३ सूचकहरू पूरा गरेर कनकाई नगरपालिकालाई बालमैत्री नगर घोषणा गरिएको नगर प्रमुख पोखरेलले जानकारी दिए ।
बालकल्याण अधिकारी उमानाथ ढकालका अनुसार कनकाई नगरपालिका झापाको तेस्रो र कोशी प्रदेशको पाँचौं बालमैत्री नगर बनेको हो । प्रमुख प्रशासकीय अधिकृत नारायण न्यौपानेले बालविवाह न्यूनीकरण, लागूऔषध नियन्त्रण, शिक्षा र स्वास्थ्यका क्षेत्रमा कार्ययोजना बनाएर काम गरिने प्रतिबद्धता जनाएका थिए ।
कार्यक्रममा प्रमुख जिल्ला अधिकारी गोपालप्रसाद अधिकारी, जिल्ला समन्वय समितिका प्रमुख विश्वनाथ बराल, शिवसताक्षि नगरपालिका नगर प्रमुख मेघा हाङ थोप्रा रोशन, नेपाली कांग्रेस नगर सभापति दुर्गा प्रसाई, नगरका विभिन्न राजनीतिक दलका प्रमुख तथा प्रतिनिधि संघ सस्थाका प्रमुख तथा प्रतिनिधि लगायतले घोषणा कार्यक्रमलाई सफल कार्यान्वयन तर्फ अगाडी बढाउन सुझाव दिएका थिए ।
नगर उपप्रमुख आशा शर्मा शिवाकोटीले औचित्य माथी प्रकाश पारेको कार्यक्रममा लिम्बु, किरात, सन्थाल समुदाय, बालसञ्जाल, स्काउट, नौमती बाजा समूहहरूको सहभागितामा भृकुटी मावि दुर्गापुरबाट नगर कार्यपालिका भवन सम्म ¥याली निकालिएको थियो ।
प्रमुख प्रशासकीय अधिकृत नारायण न्यौपानेले मन्तव्यबाट स्वागत गरेको कार्यक्रमको सञ्चालन जनप्रतिनिधिद्वय रिता उप्रेती र निर्मला खड्काले संयुक्त रुपमा गरेका थिए ।
