शिक्षा समिति सभापति अम्बरबहादुर थापा र शिक्षकहरूबीच नोकझोक चलेको छ ।
बिहीबार काठमाडौँमा शिक्षाका लागि राष्ट्रिय अभियानले आयोजना गरेको कार्यक्रममा विद्यालय शिक्षा विधेयकमाथि छलफल थियो ।
उक्त छलफलमा समिति सभापति थापाले ‘शिक्षक कर्मचारीले आन्दोलन गर्ने होइन जनताको पक्षमा काम गर्ने हो’ भनेपछि शिक्षकहरू आक्रोशित भएका थिए ।
‘जनताको करबाट तलब खाने सांसद, शिक्षक, कर्मचारी सबैले ड्युटी गर्नुपर्छ । ड्युटी नगर्ने राज्यको तलब मात्र खाने भनेर बोलेको थिएँ,’ सभापति थापाले भने, ‘शिक्षकहरूले आन्दोलन गर्न जरुरी छैन । शिक्षकले भनेभन्दा बढी ऐनमा आउँछ ।’
सभापति थापाले छलफलमा दल निकटका शिक्षक संघ संगठन पनि राख्न नहुने भनेका थिए । ‘दलको शिक्षक संघ/संगठन आवश्यक छैन । संविधानले पनि पार्टी निकटको युनियन खोल्ने भनेको छैन,’ सभापति थापाले भने । यी नै विषयमा शिक्षकहरूले असन्तुष्टि जनाएको सभापति थापाले बताए ।
सभापति थापाले शिक्षकहरूलाई अपमान गरेपछि आफूहरूले सहन नसकेको नेपाल शिक्षक महासंघकी सहअध्यक्ष नानुमाया पराजुलीले बताइन् ।
सभापति थापाले सार्वजनिक विद्यालय खत्तम् रहेको टिप्प्णी गरेकोले आफूहरूले प्रतिकार गरेको बताइन् । ‘ऐन ल्याउछौं भनेर सान्तवना दिनुपर्ने हो । तर, अपमान गर्नुभयो,’ उनले भनिन् ।
हाल विद्यालय शिक्षा विधेयक प्रतिनिधि सभाको शिक्षा समितिमा दवाफार छलफलको क्रममा छ । र विधेयक पास गर्न माग राख्दै शिक्षकहरूले आन्दोलन घोषणा गरेका छन् ।
