स्वतन्त्र विद्यार्थी युनियन (स्ववियु) निर्वाचनका लागि शनिबार राति १२ बजे मौन अवधि सुरु हुँदैछ । मौन अवधिमा कुनै पनि माध्यमबाट प्रचारप्रसार गर्न नपाइने हुँदा आज अन्तिम दिन विद्यार्थी संगठन प्रचारप्रसारमा व्यस्त बनेका छन् ।
यसैबीच झापाको मेचीनगर-१३ चारआलीमा अवस्थित त्रिदेव बहुमुखी क्याम्पसमा विभिन्न संगठनका विद्यार्थी भोट माग्न जोडतोडका साथ लागि परेका छन् ।
क्याम्पसमा नेपाली काङ्ग्रेस निकट नेविसंघ र नेकपा एमाले निकट अनेरास्ववियुले छुट्टाछुट्टै प्यानल बनाएर उम्मेदवारी दिएका छन् भने राष्ट्रिय प्रजातान्त्रिक पार्टी राप्रविसंघ र नेकपा माओवादी केन्द्र निकट अखिल क्रान्तिकारीले साझा विद्यार्थी प्यानल बनाएर निर्वाचनमा होमिएका छन् ।
त्रिदेवमा मुख्य तीन पदका लागि ९ जनाको उम्मेदवारी परेको छ भने सदस्य पदमा साझा विद्यार्थी प्यानलबाट उम्मेदवारी नपरेको निर्वाचन अधिकृत तेजप्रसाद खनालले जानकारी दिए ।
त्रिदेवमा अध्यक्ष पदका आगि अनेरास्ववियुबाट इश्वर रिजाल, नेविसंघबाट मनिराम विश्वकर्मा (मनिष) र साझा विद्यार्थी प्यानलबाट प्रज्वल भट्टराईको उम्मेदवारी परेको छ ।
त्यस्तै सचिवमा अनेरास्ववियुबाट दावा तामाङ, नेविसंघबाट सुजल अर्याल र साझा विद्यार्थी प्यानलबाट रोहन खतिवडाको उम्मेदवारी परेको छ ।
त्यसैगरी कोषाध्यक्षमा अनेरास्ववियुबाट विश्वास आचार्य, नेविसंघबाट सुनिल गौतम र साझा विद्यार्थी प्यानलबाट चेतन कठेतको उम्मेदवारी परेको निर्वाचन अधिकृत खनालले बताए ।
त्यस्तै सदस्य पदमा अनेरास्ववियुबाट विजय श्रेष्ठ, करुणा पोखरेल, सोनिका श्रेष्ठ, जनक अधिकारी र विनिता कटुवालको उम्मेदवारी परेको छ भने नेविसंघबाट सदस्यमा पुजा भण्डारी, बिमल कार्की, तुलसादेवी चम्लागाई (अनु), मनोज कार्की र सन्देश गौतमको उम्मेदवारी परेको छ ।
यसैबीच क्याम्पसमा निर्वाचनको तयारी अन्तिम चरणमा पुगेको र मतपत्र छपाईको काम धमाधम भइरहेको निर्वाचन अधिकृत तेजप्रसाद खनालले बताएका छन् ।
उनका अनुसार क्याम्पसमा मतदाताको संख्या ६८१ रहेको छ । क्याम्पसमा अहिलेसम्म सबै विद्यार्थी संगठनहरु स्वार्धमा वातावरण निर्वाचनमा होमिएको खनालले बताए ।
त्रिवि अन्तर्गतका सबै क्याम्पसमा एकैदिन चैत ५ गते निर्वाचन हुँदैछ ।
