स्वतन्त्र विद्यार्थी युनियन (स्ववियु) निर्वाचनमा अहिलेसम्म ८२ वटा क्याम्पसमा सर्वसम्मत अध्यक्ष चुनिएका छन् ।
नेकपा एमाले निकटको विद्यार्थी सङ्गठन अनेरास्ववियुका सचिव सञ्जीव धितालले ३२ वटा क्याम्पसमा स्ववियु अध्यक्ष निर्विरोध जितेको जिकिर गरेका छन् भने नेपाली कांग्रेसको भ्रातृ संस्था नेविसङ्घबाट २८ वटा क्याम्पसमा अध्यक्ष निर्विरोध निर्वाचित भएका प्रवक्ता सुरज सेजुवालले जानकारी दिए ।
यस्तै नेकपा (माओवादी केन्द्र) को विद्यार्थी सङ्गठन अखिल (क्रान्तिकारी) बाट २१ जना स्ववियु अध्यक्ष निर्विरोध निर्वाचित भएका उपाध्यक्ष मदन ढकालले बताए भने नेकपा (एकीकृत समाजवादी) निकट विद्यार्थी सङ्गठन अनेरास्ववियूले मकवानपुरमा रहेको मनहरी बहुमुखी क्याम्पसमा निर्विरोध अध्यक्ष प्राप्त गरेको छ ।
त्रिविबाट आङ्गिक ६२ सम्बन्धन प्राप्त १ हजार ४० वटा क्याम्पसमा आउँदो चैत ५ गते हुने गरी कल्याणकारी परिषद्ले निर्वाचन तालिका सार्वजनिक गरेको छ ।
यसैबीच नेविसङ्घको डा.शेखर कोइराला समूहले महेन्द्र मोरङ आदर्श बहुमुखी क्याम्पस विराटनगरको निर्वाचन कार्यालयमा आगजनी र तालाबन्दी गरेको छ भने नेविसङ्घले केन्द्रीय क्याम्पस कीर्तिपुरमा तालाबन्दी गरेको छ ।
यस्तै रोल्पामा स्ववियु चुनावका लागि नेविसङ्घविरुद्ध अनेरास्ववियु र अनेरास्ववियु (क्रान्तिकारी) ले गठबन्धन गरेका छन् भने आरआर क्याम्पसमा नेकपा एमाले र एकीकृत समाजवादीले स्ववियु निर्वाचनका लागि चुनावी तालमेल गरेका छन् ।
