बिर्तामोड नगरपालिकाले पशुपालक कृषकहरुलाई चापकटर वितरण गरेको छ ।
आज एक कार्यक्रमको आयोजना गर्दै नगरपालिकाले ५० प्रतिशत साझेदारी अनुदानमा २५ जनालाई मोटरसहितको चापकटर वितरण गरेको हो ।
उक्त अवसरमा बोल्दै नगर प्रमुख पवित्रा महतारा प्रसाईले कृषिलाई प्रविधिमैत्री बनाउन हरेक वर्ष यस प्रकारका सामग्री वितरण गर्दै आएको बताइन् । उनले कृषकहरुको मागलाई ध्यानमा राखेर विभिन्न प्रकारका सिपमुलक तालिम र मेशिन वितरण गर्दै आएको बताउँदै आगामी दिनमा अझै बढाएर लैजाने जानकारी दिइन् ।
नगरपालिकाले सार्वजनिक सूचना जारी गरेर माग निवेदनका आधारमा चापकटर वितरण गरेको हो । ६० वटा निवेदन प्राप्त भएकोमा अनुगमन गरी यस वर्ष २५ जनालाई वितरण गरेको पशुपंछी तथा मत्स्य विकास शाखा प्रमुख डा.नगेन्द्र खड्काले जानकारी दिए ।
एउटा चापकटरको मूल्य २९ हजार ५ सय रहेकोमा कृषकले १४ हजार ७५० रुपैयाँ लगानी गरेका छन् । नगरपालिकाले ३ सय वटाभन्दा बढी चापकटर यसअघि नै वितरण गरिसकेको छ ।
नगरपालिकाको पशुपंछी तथा मत्स्य विकास शाखामार्फत चापकटर, चिलिङ भ्याट, दाना पिसाउने मेशिन, मिल्क क्यान, ब्रुडिङ मेशिन (चल्ला उत्पादन गर्ने मेशिन), काउ म्याटलगायतका सामग्री हरेक वर्ष वितरण गर्दै आएको शाखा अधिकृत सावित्रा दाहालले जानकारी दिइन् ।
कार्यक्रममा नगर उपप्रमुख नगेन्द्रप्रसाद संग्रौला, वडाध्यक्षहरु राहुल शर्मा, अग्निप्रसाद पाण्डे, किशोर पौडेल, अविरल कृष्ण खरेल, दुर्योधन गुरुङ, कार्यपालिका सदस्य सिता ढुंगाना लगायतको उपस्थिति रहेको थियो ।
