झापा गोल्डकपको अध्यक्षमा दुई जनाको उम्मेद्वारी परेको छ ।
अध्यक्ष पदका लागि केदार गिरी र बलराम कार्कीको उम्मेद्वारी परेको हो । गिरी झापा गोल्डकपका कोषाध्यक्ष र कार्की बरिष्ठ उपाध्यक्ष हुन् ।
त्यसैगरी वरिष्ठ उपाध्यक्ष र उपाध्यक्षमा दुईजना निर्विरोध भएका छन् । निर्वाचन समितिले सार्वजनिक गरेको उम्मेदवारको प्रथम नामावलीमा दुईजना निर्विरोध भएका हुन् ।
निर्वाचन समितिका अनुसार वरिष्ठ उपाध्यक्षमा गजेन्द्रबहादुर पौडेल र उपाध्यक्षमा युवराज कार्की (पर्वत) निर्विरोध भएका छन् । पौडेल यसअघि स्थापनाकालदेखि सचिव थिए भने कार्की संस्थापक सदस्य थिए ।
आज बिर्तामोडस्थित अतिथि सदनमा भइरहेको निर्वाचन प्रक्रियामा गोल्डकपका सदस्यहरुले उम्मेदवारी दर्ता गराएका छन् । पदाधिकारीमा दुई पदबाहेक अन्य पदहरुमा दुई-दुई जनाको उम्मेदवारी परेको छ ।
त्यसैगरी आठ जना सदस्यका लागि १६ जनाले उम्मेदवारी दिएका छन् । त्यस्तै सचिवमा बिर्तामोड उद्योग वाणिज्य संघका निवर्तमान अध्यक्ष प्रकाश शिवाकोटी र गोल्डकपका सदस्य बुद्ध तामाङले उम्मेदवारी दिएका छन् ।
त्यसैगरी सहसचिवमा वर्तमान कार्यसमिति सदस्य यादव पोखरेल र विष्णु सिग्देल तथा कोषाध्यक्षमा वर्तमान कार्यसमिति सदस्य चन्द्रमणि कट्टेल र बिर्तामोड उद्योग वाणिज्य संघका कोषाध्यक्ष युवराज निरौलाले उम्मेदवारी दिएका छन् । झापा गोल्डकपको अधिवेशनको उद्घाटन सत्र सम्पन्न भएपछि निर्वाचन प्रक्रिया सुरु गरिएको हो ।
