साहित्यकार डा.चन्द्र गिरीसँग बिर्तामोडमा साहित्यिक भेटघाट तथा अन्तरक्रिया कार्यक्रम सम्पन्न भएको छ ।
अमेरिकी सरकारको वातावरण मन्त्रालयका वरिष्ठ सल्लाहकार समेत रहेका साहित्यकार डा.गिरी झापा आएको मौका पारी वीरता रिडर्स झापाले कार्यक्रम आयोजना गरेको हो ।
बिर्तामोडस्थित होटल किङ्सबेरीमा आयोजना गरिएको कार्यक्रममा साहित्यकार डा.गिरीद्वारा लिखित दुई कृति “मैले नदेखेको सपना” र “संसारको सेरोफेरो” माथि चर्चा समेत गरिएको थियो ।
साहित्य सर्जक तथा साहित्यप्रेमी पाठकहरुको उपस्थिति रहेको कार्यक्रममा उनीहरुले साहित्यकार डा. गिरीलाई साहित्य, उनको यात्रा अनुभव र अमेरिका बसाइ बारे विविध जिज्ञासा राखेका थिए ।
जिज्ञासाहरुलाई सम्बोधन गर्दै साहित्यकार डा.गिरीले अमेरिकाको सरकारी निकायमा उच्च तहमा बसेर काम गर्ने थोरै नेपाली मध्ये आफू पनि एक हुन पाएकोमा खुशी व्यक्त गरेका छन् । जहाँ बसे पनि देश प्रेमले सताइरहने र देशका लागि केही न केही गरिरहन मन लाग्ने उनले बताए ।
खोटाङमा जन्मेका साहित्यकार डा.गिरीले नेपालबाट बि. एस्सी. साइन्स र बि. एस्सी. फरेस्ट्री तथा थाइल्यान्डबाट एम.एस. र पि.एच.डी.सम्मको औपचारिक अध्ययन पूरा गरेका छन् ।
कार्यक्रममा साहित्यकारहरु तीर्थ सिग्देल, सन्तोष आचार्य, लीला अनमोल, मिलन सङ्ग्रौला, हरी बराल, डि.जी शर्मा, पत्रकार राजकुमार ओली, साहित्यसेवी केशव मैनाली, सरोज पौडेल, भगिरथ राई, साहित्यानुरागी राज कानागामानी, सैरक मैनाली, टेकनाथ वाग्ले, सुजता गुरुङ, प्रकाश गुरुङ लगायतको उपस्थिति रहेको थियो ।
वीरता रिडर्सका संयोजक तथा पत्रकार तीर्थ सिग्देलले कार्यक्रम बारे प्रकाश पारेका थिए भने ईशा बुक्स एन्ड स्टेशनरी बिर्तामोडका सञ्चालक केशव मैनालीले उपस्थित सबैलाई धन्यवाद ज्ञापन गरेका थिए ।
उक्त अन्तरक्रियामा साहित्य पोस्टका युरोप संयोजक समेत रहेका कवि डि.जी शर्माले सहजीकरण गरेका थिए ।
