झापाको मेचीनगरमा ‘प्रथम इण्डो नेपाल अन्तराष्ट्रिय तेक्वान्दो च्याम्पियनसिप-२०२५’ हुने भएको छ ।
काँकरभिट्टा तेक्वान्दो डोझाङ्गको आयोजनामा यही माघ १२ गतेदेखि प्रतियोगिता हुन लागेको हो ।
खेलाडी उत्पादन गर्नुका साथै नेपाल भारतको सम्बन्ध खेलकुद क्षेत्रमा पनि सुमधुर बनाउने लक्ष्यका साथ नेपालको सिमावर्ती शहरमा पहिलो पटक अन्तराष्ट्रिय तेक्वान्दो च्याम्पियनसिप गर्न लागिएको बिहिबार काँकरभिट्टामा पत्रकार सम्मेलनमार्फत आयोजकले जानकारी दिएको छ ।
माघ १३ गतेसम्म सञ्चालन हुने प्रतियोगितामा नेपालका विभिन्न जिल्लाबाट खेलाडी सहभागि हुने छन् । त्यस्तै छिमेकी मुलुक भारतको विभिन्न जिल्लाबाट समेत १५० बढी खेलाडीको सहभागिता हुने अनुमान गरिएको प्रतियोगिताका संयोजक विशाल गिरीले जानकारी दिए ।
उक्त प्रतियोगितामा विभिन्न विधामा प्रतिस्पर्धा हुनेछ । महिला र पुरुषको छुट्टा-छुट्टै पुम्से र क्यारोगी (फाइट) विधामा प्रतियोगिता हुने आयोजक काँकरभिट्टा तेक्वान्दो डोझाङ्गका अध्यक्ष विजय न्यौपानेले जानकारी दिए ।
उनका अनुसार प्रतियोगितामा विजेता खेलाडीले नगदसहित ट्रफी, मेडल एवम् प्रमाणपत्र प्राप्त गर्नेछन् ।
