झापाको बिर्तामोड-१ स्थित निता भेटवाल स्मृति प्रतिष्ठान नेपालले १० जना विद्यार्थीलाई पुरस्कृत गरेको छ ।
प्रतिष्ठानले आयोजना गरेको ‘शान्तिका लागि बुद्धको उपदेश’ शीर्षकको निवन्ध प्रतियोगिताका विजयी प्रतियोगीलाई शनिबार बिर्तामोडमा आयोजित एक समारोहका बीच नगदसहित सम्मान गरेको हो ।
निवन्ध प्रतियोगितामा प्रथम हुने देवी माध्यमिक विद्यालयकी छात्रा ज्योति ढुङ्गेल, दोस्रो हुने मोहनमाया माविकी छात्रा एलिना तिम्सिना र तेस्रो हुने शनिश्चरे माविकी छात्रा सन्ध्या खतिवडालाई प्रतिष्ठानले क्रमश: ७० हजार, ५० हजार र ३० हजार नगदसहित सम्मानपत्रले सम्मान गरेको थियो ।
यसैगरी छात्रा निर्जला आचार्य, दिप्ती सुवेदी, तृषा सापकोटा, सुस्मिता खतिवडा, आशिका संग्रौला, छात्र सौगात खनाल र रोहन सुनुवारलाई नगद ७ हजारसहित सान्त्वना पुरस्कारका साथ सम्मानपत्रले सम्मान गरिएको थियो ।
प्रतिष्ठानका अध्यक्ष उमानाथ ओलीको अध्यक्षतामा भएको समारोहका प्रमुख अतिथि कोशी प्रदेशका खानेपानी, सिँचाइ तथा ऊर्जा मन्त्री एकराज कार्कीलगायतले विजेता प्रतियोगीलाई सम्मान गरेका थिए ।
निता भेटवालका पिता तथा प्रतिष्ठानका संरक्षक विष्णुप्रसाद भेटवालले छोरीको अन्तिम इच्छाअनुरुप अति विपन्न परिवारका छात्र तथा छात्राहरुको अध्ययनमा सहयोग गर्दै आएको बताए । भेटवालले आमाबुवा नभएका बालबालिकाको अभिभावकत्व ग्रहण गर्नेसमेत बताएका छन् ।
उनले विपन्न परिवारका पढ्न चाहेर पनि नसकेका विद्यार्थीलाई कक्षा १२ सम्म अध्ययन गराउन सहयोगका साथै थप उच्च अध्ययनका लागि समन्वय गर्ने र गरिँदै आएको बताए । प्रतिष्ठानले विपन्न परिवारका ११ जना विद्यार्थीलाई बिर्तामोडकै एक निजी विद्यालयमा सम्पूर्ण खर्च व्यहोर्ने गरी पढाइरहेको प्रतिष्ठानका सचिव माधव विद्रोहीले बताए ।
व्रेन ट्युमरका कारण २५ वर्षकै उमेरमा ज्यान गुमाएकी निताको स्मृतिमा उनका बुबा विष्णुप्रसाद र आमा विष्णुमाया भेटवालले प्रतिष्ठान स्थापना गरेका हुन् ।
समारोहमा प्रमुख अतिथि मन्त्री कार्की, अर्जुनधारा नगरपालिकाका प्रम्ख मेयर बलदेवसिंह गोम्देन तामाङ, परिवारका सदस्य अमरदीप भेटवाललगायतले प्रतिष्ठानले शिक्षा क्षेत्रमा अत्यन्त उपयोगी कार्य गरेको भन्दै प्रशंसा गरेका थिए ।
निवन्ध प्रतियोगिता संयोजन समितिका सदस्य डा.ठाकुरप्रसाद पोखरेलले निबन्ध प्रतियोगिता सञ्चालनका विषयमा जानकारी गराएको समारोहमा निवन्ध प्रतियोगिताका बिजेताहरुको नाम शिक्षासेवी होम सुवेदीले घोषणा गरेका थिए ।
प्रतिष्ठानका अध्यक्ष ओलीले स्वागतसहित औचित्यमाथि प्रकाश पारेको समारोहको सञ्चालन प्रतिष्ठानका सचिव माधव विद्रोहीले गरेका थिए ।
