बिर्तामोडस्थित हिकोला रोडलाई एकतर्फी बनाइएको छ ।
जिल्ला ट्राफिक प्रहरी कार्यालय झापा र बिर्तामोड नगरपालिका वडा नं.५ सँग सहकार्य गर्दै बिर्तामोड उद्योग बाणिज्य संघ बिर्तामोडको अगुवाईमा हिकोला रोड एकतर्फी बनाइएको हो ।
बिर्तामोड बजार क्षेत्रमा दिनानुदिन भीडभाड बढ्दै जान थालेपछि सहजताका लागि हिकोला रोडलाई एकतर्फी बनाइएको बिर्तामोड उद्योग वाणिज्य संघका अध्यक्ष राजु न्यौपानेले बताए ।
जिल्ला ट्राफिक प्रहरी कार्यालयका प्रमुख गणेश पौडेल, बिर्तामोड वडा नं.५ का वडाध्यक्ष रोहित प्रसाई, विभिन्न सामाजिक संघसंस्थाको अगुवाईमा आज बिहानबाट हिकोला रोड एकतर्फी बनाइएको हो ।
यसअघि बिर्तामोड उद्योग वाणिज्य संघको सभाहलमा उक्त रोडलाई एकतर्फी बनाउने विषयमा छलफल भएको थियो । छलफलमा काँकरभिट्टा रोडबाट कृषिथोक जाने हिकोला रोडमा सवारीसाधन एकतर्फी (दक्षिणबाट उत्तर) मात्र सञ्चालन गर्न पाइने निर्णय गरिएको छ ।
त्यस्तै, हिकोला रोडमा प्रत्येक महिनाको १५ गतेसम्म सडकको पूर्वतर्फ र १६ गतेबाट मसान्तसम्म पश्चिमतर्फ दुईपाङ्ग्रे मात्र पार्किङ गर्न पाइने भएको छ । हिकोला रोडमा सामग्रीहरु लोड अनलोड गर्ने ठूला सवारीसाधनलाई बिहान ९ देखि बेलुका ६ बजेसम्म प्रवेश निषेध गर्ने र शनिश्चरे रोड ग्लोबल आइएमइ बैंक हुँदै कृषि थोक चोक (चौबाटो) सडक क्षेत्रमा पार्किङ निषेध गर्ने निर्णय भएको संघका अध्यक्ष न्यौपानेले बताए ।
हिकोला रोड एकतर्फी बनाइएसँगै लायन्स क्लव अफ बिर्तामोड सिटीले २० वटा सांकेतिक वोर्ड प्रदान गरेको छ । लायन्स क्लवका अध्यक्ष उपेन्द्र वानियाले सांकेतिक बोर्ड प्रदान गरेका थिए ।
बोर्ड हस्तान्तरण कार्यक्रममा बिर्तामोड उद्योग वणिज्य संघका अध्यक्ष राजु न्यौपाने, जिल्ला ट्राफिक प्रहरी कार्यालय झापाका प्रमुख गणेश पौडेल, लायन्स क्लवका अध्यक्ष उपेन्द्र बानियालगायतले बोलेका थिए ।
उक्त कार्यक्रमको सञ्चालन बिर्तामोड उद्योग वाणिज्य संघका कोषाध्यक्ष युवराज निरौलाले गरेका थिए ।
