काँकडभिट्टाबाट काठमाडौँतर्फ जाँदै गरेको प्र १-०१-००१ ख ४३३१ नं को रात्रिबसले कमल गाउँपालिकाको केर्खामा इलेक्ट्रिक साइकललाई ठक्कर दिँदा हजुरबुवा र नातिनीको घटनास्थलमै मृत्यु भएको छ ।
मृत्यु हुनेमा कमल गाउँपालिका वडा नं.३ का मनोज लिम्बूकी अन्दाजी ९ वर्षकी छोरी कृपा लिम्बू र उनका बुवा ६० वर्षीय टेकबहादुर लिम्बूको रहेका छन् ।
ठक्कर दिने बसलाई तोडफोड गरिएको छ भने प्रहरी चौकी केर्खामा राखिएको त्यस बसलाई आगजनी गर्ने प्रयास गरिएको थियो । आक्रोशितहरुले प्रहरी चौकी केर्खामा ढुंगामुढा गरेका थिए । पूर्वबाट पश्चिमतर्फ जाँदै गरेका यातायातका साधन शिवसताक्षीस्थित कमल खोलाको पुलमा रोकिएका थिए भने पूर्वतर्फ आउने यातायातका साधन सीतापुरीमा रोकिएका थिए । जसका कारण गन्तव्यमा पुग्ने यात्रु बीचबाटोमै अलपत्र परेका थिए ।
केर्खा बजारमा रहेको प्रहरी बिट आगजनी गरेर ध्वस्त बनाइदिएका छन् । आगलागी नियन्त्रणका लागि तयारी अवस्थामा रहेको दमकल ३०० मिटर नजिकको प्रहरी बिटमा लगाइएको आगो निभाउन आउन सकेन । प्रहरी चौकीको गेट बाहिरैबाट ढुङ्गामुढा प्रहार गर्दा बसमा क्षति भएको छ भने प्रहरी चौकीको झ्यालमा समेत क्षति भएको छ ।
यस्तै प्रहरीलाई ढुङ्गा हान्ने क्रममा प्रहरी चौकी अगाडि पार्किङ गरिएको दमकलको सिसा फुटेको छ । भड्किएको स्थिति नियन्त्रणमा लिन प्रहरीले केर्खामा दर्जनौं सेल अश्रुग्यास प्रहार गरेको थियो । जनपद प्रहरीले १५ सेल र सशस्त्र प्रहरी बलले १४ सेल अश्रुग्यास फायर गरेको थियो । आक्रोशित स्थानीयले ढुंगामुढा गर्दा नेपाल प्रहरीतर्फ पाँच जना र सशस्त्र प्रहरीतर्फ पाँच जना घाइते भएका छन् । उनीहरुको अबस्था सामान्य रहेको जिल्ला प्रहरी कार्यलय झापाले जनाएको छ ।
आक्रोशित स्थानीयले केर्खामा रहेको प्रहरी बिट र ट्राफिक प्रहरी बिटमा ढुङ्गामुढा, तोडफोड र आगजनी गरेका छन् । त्यस्तै स्थानीयले ढुङ्गामुढा गर्दा घटनास्थलनजिकै रहेको मे १ ख २७४४ नं.को न्यू सूर्योदय यातायात यात्रुबाहक बसको अगाडीको सिसा चर्किएको छ । त्यस्तै बायाँ साइडको ४-५ वटा झ्यालको सिसा फुटेको छ । साथै, प्रहरीले बल प्रयोग गरि तितरबितर बनाउने क्रममा आन्दोलनकारीहरुले घटनास्थलनजिकै रहेको प्रदेश १-०१-००१ ख ४०३७ नम्बरको अर्को बसको बायाँ साइडको पछाडिको २ वटा सिसाहरु तोडफोड गरेका थिए ।
यसैबीच दुर्घटनापछि अवरुद्ध पूर्वपश्चिम राजमार्ग करिव १२ घण्टापछि सुचारु भएको छ । पीडित पक्षसँग चार बुँदे सहमति भएपछि आज बिहान ५ बजेदेखि राजमार्ग सुचारु भएको हो ।
