आफ्ना सन्तानको भविष्य सुन्दर बनाउने हरेक अभिभावकको चाहना हुन्छ । संस्थागत विद्यालयबाट मात्र गुणस्तरीय शिक्षा पाइन्छ भनेर छोराछोरीलाई ऋण गरेर भए पनि महँगा र ठुला विद्यालयमा भर्ना गर्ने क्रम बढ्दै गएको छ । तर सामुदायिक विद्यालयबाट नि:शुल्क रुपमा अङ्ग्रेजी माध्यमबाट पढाइ हुन थालेपछि बिर्तामोडमा अवस्थित लक्ष्मीनारायण आधारभूत विद्यालयमा बालबालिकाको आकर्षण बढ्दै गएको छ ।
बिर्तामोड नगरपालिका वडा नं.१० मा रहेको विद्यालयमा उच्च प्रविधिको पुस्तकालयका साथै दक्ष शिक्षकबाट गुणस्तरीय तरिकाले अध्यापन हुन थालेपछि लक्ष्मीनारायण अभिभावकको रोजाइमा पर्न थालेको प्रधानाध्यापक जनकबहादुर थापाले जानकारी दिए ।
उनका अनुसार पुस्तकालयमा अध्ययनका नियमित विद्यार्थी बाहेक स्थानीय समेत आउने गरेको प्रधानाध्यापक थापा बताउँछन् ।
नेदरल्यान्डसको थाङ्ग फाउन्डेसनले उक्त पुस्तकालय करिव आठ लाख रुपैयाँको लागतमा निर्माण गरेको थियोे भने यस आर्थिक वर्षमा बिर्तामोड नगरपालिकाले ६ लाख उपलब्ध गरेपछि पुस्तकालयलाई अझ व्यवस्थित पारिएको प्रधानाध्यापक थापाले बताएका छन् ।
बिर्तामोड नगरपालिका र विभिन्न संघसंस्थाले गरेको सहयोगले विद्यालयको भौतिक तथा शैक्षिक विकास भएको छ । प्रधानाध्यापक थापाले भने, वास्तविक बोर्डिङ भनेको कस्तो हुनुपर्छ भन्ने कुरा हाम्रो विद्यालयमा देखिन्छ ।
बालबालिका विद्यालय आउन नमाने शिक्षक घरमै गएर विद्यार्थीलाई सम्झाउने गर्दछन् । तीन वर्ष अघिसम्म विद्यालयमा विद्यार्थीको संख्या न्युन थियो । विद्यार्थी र अभिभावकको कुनै चासो थिएन । तर, सुधार आरम्भ भएपछि विद्यार्थी र अभिभावकको रोजाईमा परेको छ । विद्यालयले नमूना विद्यालयको पहिचान बनाएको छ ।
