कास्कीको पोखरा महानगरपालिकाको प्रमुख पदमा सत्ता गठबन्धनतर्फका साझा उमेदवार नेकपा एकीकृत समाजवादीका धनराज आचार्यको जित निश्चित भइसक्यो । तीनवटा वडाको केही मत भने गन्न बाँकी छ ।
तर, नेकपा एमालेका प्रतिनिधि गणनास्थल गएका छैनन् । प्रतिनिधि नै नआएपछि अहिले पोखराका २२, ३२ र ३३ नम्बर वडाको मतगणनाकार्य प्रभावित भएको छ ।
मंगलबार बिहान एमालेले मुख्य निर्वाचन अधिकृतको कार्यालयमा वडा नम्बर–३१ र १८ को पुनः मतगणना गर्नुपर्ने माग गर्दै निवेदन समेत दिएको छ । कांग्रेसले जितेका यी वडामध्ये १८ मा एमाले तीन मतले पराजित भएको थियो । यही वडामा खसेको ६ मत मतपेटिकामा नभएको भन्दै एमाले गण्डकी प्रदेश अध्यक्ष नवराज शर्माले पुनः गणनाको मागसहित निवेदन दिएका हुन् ।
वडा–३१ मा भने तीन मत मतपेटिकामा भेटिएको थिएन । त्यसको निर्णय नहुँदासम्म मतगणनामा नबस्ने एमालेको अडानका कारण गणना रोकिएको हो ।
हालसम्म एक लाख ३९ हजार ४१ मतगणना भइसकेको छ । यहाँ एक लाख ४३ हजार २२६ मत खसेको छ । अब तीन हजार ८१५ मत गन्न बाँकी छ । मत गन्न बाँकी रहँदै धनराज आचार्य र उपप्रमुखमा एमालेकी उमेदवार मञ्जुदेवी गुरुङको जित निश्चितजस्तै भइसकेको छ ।
