आज रातिबाट मौन अवधि सुरु हुने भएपछि दलका शीर्ष नेतालाई चुनावी सभामा भाषण गर्न भ्याइनभ्याइ भएको छ।
केही दिनदेखि देशव्यापी दौडाहामा रहेका शीर्ष नेताहरु आज स्थानीय तहको चुनावी प्रचार प्रसार सक्दैछन्। कांग्रेस सभापति समेत रहेका प्रधानमन्त्री र शेरबहादुर देउवा र एमाले अध्यक्ष केपी शर्मा ओली दुवै आ–आफ्नो गृह जिल्लामा आज व्यस्त छन्।
हिजो धनगढीको सभा सकेर डडेल्धुरा पुगेका प्रधानमन्त्री देउवाले आज दुई वटा चुनावी सभालाई सम्बोधन गर्ने कार्यक्रम रहेको छ। डडेल्धुराको सभामा कांग्रेस वरिष्ठ नेता रामचन्द्र पौडेल लगायतका नेताले पनि सम्बोधन गर्नेछन्।
यस्तै, एमाले अध्यक्ष ओलीले झापा र मोरङका विभिन्न स्थानमा पाँच वटा सभालाई सम्बोधन गर्दैछन्।
हिजै बेलुकी झापा पुगेका ओलीले मोरङको मिक्लाजुङ गाउँपालिका, झापाको गौरीगन्ज र कमल गाउँपालिका तथा दमक र गौरादह नगरपालिकामा आयोजित सभालाई सम्बोधन गर्ने उनको सचिवालयले जनाएको छ।
झापाबाट फर्किएर उनले आज काठमाडौंमा आयोजित चुनावी सभालाई सम्बोधन गर्ने कार्यक्रम रहेको छ। स्थानीय निर्वाचन लक्षित अन्तिम सभा काठमाडौंको भृकुटीमण्डपमा दिउँसो २ बजे गर्न लागिएको एमालेले जनाएको छ।
