राष्ट्रिय प्रजातन्त्र पार्टीले नवलपुरको कावासोतीमा वडाध्यक्षको घरमा भएको आगजनीको निन्दा गरेको छ।
पार्टीका प्रवक्ता मोहन श्रेष्ठले आज विज्ञप्ति निकालेर घटनाको निन्दा तथा भर्त्सना गरेका छन्। प्रवक्ता श्रेष्ठले घटनाको सत्य तथ्य छानबिन गरी दोषी पत्ता लगाई कारबाही गर्न माग गरेका छन्।
गतराति कावासोती नगरपालिका १६ का वडाध्यक्षका उम्मेदवार सुमन भट्टको घरमा अज्ञात समूहले आगजनी गरेको थियो। आगलागीबाट पार्टी कार्यालयमा समेत क्षति पुगेको राप्रपाले जनाएको छ ।
यस्तै कांग्रेस परित्याग गरी राप्रपाबाट काठमाडौं गोकर्णेश्वर नगरपालिका ५ मा वडाध्यक्षका उम्मेदवार सन्तोष अर्याललाई ज्यान मार्ने धम्की दिएकोप्रति पनि राप्रपाले दुःख व्यक्त गरेको छ।
परिचित व्यक्तिले नै कांग्रेस हराउन हिँडेको भन्दै ज्यान मार्ने धम्की आएको घटनाप्रति प्रवक्ता श्रेष्ठले राजनीतिक दल छान्ने व्यक्तिको निजी अधिकारमाथि धावा बोल्ने काम लोकतन्त्रमा सह्य नहुने बताए।
जनताको माझमा आफ्नो एजेण्डा लिएर गइरहेका उम्मेदवारलाई निर्बाध चुनाव प्रचारको वातावरण बनाउन, दोषीलाई कारबाही गर्न, उम्मेदवारको सुरक्षामा गम्भीर बन्न र भयरहित वातावरणमा निर्वाचन गराउन राप्रपाले सरकार र आयोगको ध्यानाकर्षण गराएको छ।
