नेकपा एमालेका उपाध्यक्ष विष्णु पौडेलले अहिलेको सत्ता गठबन्धन बालुवा र तासको घर भएकाले तर्सनुपर्ने अवस्था नरहेको बताएका छन् ।
बुधबार रुपन्देहीको तिलोत्तमा नगरपालिकामा आयोजित उमेदवार अभिमुखीकरण तथा अगुवा कार्यकर्ता भेलालाई सम्बोधन गर्दै पौडेलले बालुवा र तासको घरजस्तै रहेको गठबन्धन एमालेका लागि चुनौती हुन नसक्ने जिकिर गरे । गठबन्धनसँग तर्सनु नपर्ने उनको भनाइ छ ।
निर्वाचनमा पराजय हुने स्वीकार गरेर गठबन्धन बनाइएको उनले तर्क गरे । एमालेले जित्दा मुलुकको समृद्धि र विकास अघि बढ्ने भएकाले जनताका लागि जित हासिल गर्नुपर्ने धारणा राखे ।
सरकारमा रहेका दलहरू आजका मितिमा पनि निर्वाचन सार्ने षड्यन्त्रमा लागिरहेको उनको आरोप छ । उनले जतिसुकै कोसिस गरे पनि समयमा नै निर्वाचन गर्न र एमालेलाई विजयी हुनबाट कसैले रोक्न नसक्ने दाबी गरे ।
पौडेलले स्थानीय तहमा जितको सुरुवात गर्दै प्रदेश र केन्द्रको निर्वाचनमा विजयी हुँदै एमालेको एकल नेतृत्वको सरकार गठन हुने जिकिर पनि गरे ।
