२९ चैत, बिर्तामोड । आगामी बैशाख ३ गतेदेखि सुरु हुने झापा सुपर लिग(जेएसएल) का लागि बिर्तामोडको बोस्टन ब्लास्टर्स क्लवले करण केसी सहितका खेलाडी मैदान उतार्ने भएको छ ।
ब्लास्टर्सले आज झापाको धुलाबारीमा आयोजना गरेको पत्रकार सम्मेलनमा रास्ट्रीय टोलीका महत्वपूर्ण खेलाडी करण केसीलाई अनुबन्ध गरेको जानकारी दिएको हो ।
काँकडभिट्टा खेल मैदानमा आयोजना हुने उक्त प्रतियोगिताको उपाधी जित्ने लक्ष्य सहित ब्लास्टर्सले तयारी गरेको क्लवका अध्यक्ष शोभित बाँस्तोलाले बताए ।
क्लबले मार्की खेलाडीको रुपमा समिर कार्की र आइकोनिक खेलाडीका रुपमा मिनास थापालाई टिममा अनुबन्ध गरेको क्लवका मुख्य प्रशिक्षक विनित बाँस्तोलाले जानकारी दिए ।
टोलिको कप्तानी सुरज खड्काले सम्हाल्नेछन भने अन्य खेलाडीहरुमा अभि योङहाङ लिम्बू, अमन गोयल, अर्बिन क्षेत्री रहेका छन् ।
वसन्त सिर्जन कोइराला, विवेक चिमरिया, विदान गोश्वामी, विपिन कार्की, दिपु भूजेल, नविन पाठक, राहुल पाठक, सरोज श्रेष्ठ, सिद्धार्थ कुमाल र सुनिल आचार्य बोस्टन ब्लास्टर्सबाट खेल्ने छन् ।
बोस्टन ब्लास्टर्स तीन वर्षअघि बिर्तामोडमा स्थापना भएको बोस्टन क्रिकेट एकाडेमीको क्लब हो । यसअघि विभिन्न प्रतियोगिताको उपाधि समेत उचालिसकेको क्लबले जेएसएलमा राष्ट्रिय क्रिकेट टोलीका सदस्य करण केसीसहितका खेलाडी मैदान उतार्ने योजना प्रमुख विशाल अग्रवालले जानकारी दिए ।
नेपाली क्रिकेटलाई अझ मजबुद बनाउन बोस्टन ब्लास्टर्सले आगामी दिनमा योगदान पुर्याउने प्रशिक्षक बाँस्तोलाले बताए ।
