साउन २१, झापा । कोरोना महामारीका कारण विद्यालय बन्द भएका बेला पनि बालबालिकालाई सृजनशील बन्न प्रेरित गर्ने उदेश्यले रेडियो कार्यक्रम प्रसारण हुँदै आएको कार्यक्रम ‘बालबालिका र शिक्षा’ पाँचथरको रेडियो मितेरीबाट पनि प्रसारण हुने भएको छ।
पाँचथरबाट प्रसारित रेडियो मितेरीबाट शुक्रबार बेलुकी ७:१५ बजे प्रसारण हुने स्टेशन म्यानेजर खबिन लुइटेलले जानकारी दिए। यसअघि झापाबाट आँगन एफएम ८९.६ मेगाहर्ज, इलामको रेडियो फिकल ९०.६ मेघाहर्ज र मोरङ्गको रेडियो रिदम ९९.७ मेघाहर्जमा बालबालिका लक्षित कार्यक्रम बालबालिका र शिक्षा प्रसारण हुँदै आएको थियो ।
लामो समय विद्यालय बन्द हुँदा बालबालिकाको सिकाइमा नकारात्मक असर पर्नुका साथै मनोबैज्ञानिक प्रभाव पनि पर्ने भएकाले रेडियो कार्यक्रम मार्फत बालबालिकामा सकारात्मक सन्देश संचार गर्न खोजिएको हो।
ग्लोरी इंग्लिस स्कुल बिर्तामोड , वेल्स मोडल स्कुल बिर्तामोड,दुर्गा माद्यामिक बिद्यालय बिर्तामोड र वीर अमर सिंह प्राबिधिक बिद्यालय बिर्तामोड सँगको सहकार्यमा उत्पादन हुने कार्यक्रम हरेक आँगन एफएम बाट शुक्रबार बेलुका ७:१५ बजे र पुन: प्रसारण शनिबार बिहान ८:१५ बजे प्रसारण हुँदै आएको कार्यक्रम संयोजक सरोज पौडेलले जानकारी दिए । कार्यक्रमले विद्यार्थीहरुमा चेतनाको बिकास र अपन्त्व महसुस हुने बिद्यालयका संचालनको भनाइ रहेको छ ।
साप्ताहिक रुपमा प्रसारण हुने कार्यक्रममा शैक्षिक गतिविधिहरु र बालबालिकाका प्रतिभाहरु समेटिनेछ । संचारकर्मी चेतन लामिछाने , सृजन घिमिरे, बालबालिका र शिक्षकको आवाजमा उत्पादन हुने कार्यक्रमले बालबालिकामा सकारात्मक सन्देश प्रभाव गर्ने अपेक्षा गरिएको छ । त्यस्तै विषम परिस्थितिको समयलाई कसरी सदुपयोग गर्ने भन्ने बारे पनि सामाग्री प्रस्तुत गरिने जनाईएको छ ।
राष्ट्रिय तथा अन्तर्राष्ट्रिय रुपमा ख्याति कमाएका ब्यक्तिहरुको सफलताको कथा उनीहरुकै आवाजमा मेरो कथा स्तम्भ मार्फत प्रस्तुत गरिनेछ । शिक्षा क्षेत्रका जानकारहरुसँगको बहस समेत समेटेर एक पूर्ण बालबालिका केन्द्रित शैक्षिक कार्यक्रम उत्पादन गरिने एफएमकी समाचार संयोजक पुस्पा लिम्बुले बताइन्।
