जेठ २७,काठमाण्डौ । कोरोना र निषेधाज्ञाका कारणले गर्दा यो वर्षको शैक्षिक सत्र ढिला गरी असारदेखि सुरु हुँदैछ । अघिल्ला वर्षहरूमा शैक्षिक सत्र सुरु भएको पाँच छ महिना बित्दासमेत विद्यालयमा पुस्तक नपुगेका समाचार आउने गर्थे । तर यो वर्ष पाठ्यपुस्तक विद्यार्थीसम्म समयमै पुग्ने जनक शिक्षा सामग्री केन्द्र लिमिटेडले जनाएको छ ।
कक्षा एकदेखि १० सम्मका सबै पाठ्यपुस्तक अहिले सातवटै प्रदेशको प्रादेशिक केन्द्रमा पुर्याइ सकिएको र देशभर रहेको एघार सयभन्दा धेरै बिक्रेताहरुबाट बिक्रीवितरण भइरहेको केन्द्रका सूचना अधिकारी चित्रकुमार आचार्यले जानकारी दिए ।
उनले भने ‘प्रदेश १ को विराटनगर, दुई नम्बर प्रदेशको जनकपुरमा रहेको प्रादेशिक कार्यालयमा किताब पुर्याइ सकिएको छ।’ वाग्मती प्रदेशको लागि केन्द्रबाट पनि बिक्रीवितरण हुने गरेको छ । यस्तै चितवनको भरतपुरमा रहेको कार्यालयबाट वाग्मती प्रदेशका केही जिल्ला र दुई नम्बर प्रदेशका केही जिल्लामा किताब बिक्री हुने गरेको छ । नवलपरासी, बुटवल, नेपालगञ्ज र पोखरामा पनि केन्द्रीय कार्यालयहरु रहेका छन् । यस्तै सुर्खेत र धनगढीमा रहेका प्रादेशिक कार्यालयहरुमा पनि किताब पुगिसकेका छन् ।
केन्द्रले गर्नुपर्ने सबै काम पूरा गरिसकेकाले अरु खालका समस्या नभएमा शैक्षिक सत्रको सुरुवातमै सबै विद्यार्थीको हातमा पुस्तक पुग्ने उनले बताउए । सातवटै प्रदेशको प्रादेशिक कार्यालयमा किताब पुगिसकेको भए पनि निषेधाज्ञाका कारणले देशको कुनाकाप्चासम्म पुग्नका लागि केही समय भने लाग्न सक्ने उनको भनाइ छ ।
शैक्षिक सत्र असारदेखि सुरु हुने भए पनि केही समय भर्ना अभियान चल्छ । त्यसपछि पढाइ सुरु हुँदासम्म विद्यार्थीको हातहातमा किताब पुगिसक्ने पनि आचार्यले बताए । निषेधाज्ञाका कारण ढुवानीमा समस्या हुन नदिन सम्बन्धित पालिकालाई समन्वय गरिदिन पनि केन्द्रले आग्रह गरेको छ ।
दुईरतीन वर्षयता फाट्टफुट्ट रुपमा बाहेक किताब अभाव भएको गुनासो आएको छैन । ‘हामीले केही वर्षयता समयै पाठ्यपुस्तक छपाइ गर्ने गरेका छौँ । किताब कुनै सिजनमा छाप्ने होइन, वर्षभरि नै छाप्ने हो । अहिले पनि हामीले अर्को शैक्षिक सत्रका लागि किताब छापिरहेका छौँ ’।
यो शैक्षिक सत्रका लागि एक करोड ८४ लाख थान किताब छापिएको छ ।
