थप २ सय २५ कोरोना संक्रमितको मृत्यु, ९४ सय ८३ संक्रमित थपिए

संवाददाता/ मङ्गलबार, बैशाख २८, २०७८

काठमाडौं । नेपालमा थप २ सय २५ जना कोरोना संक्रमितको मृत्यु भएको छ ।

स्वास्थ्य तथा जनसंख्या मन्त्रालयले सार्वजनिक गरेको विवरण अनुसार थप २ सय २५ जनाको कोरोना संक्रमणका कारण मृत्यु भएको हो ।

मन्त्रालयले यसलाई नेपाली सेनाले विभिन्न मितिमा शव व्यवस्थापन गरेको उल्लेख गरेको छ । यससँगै नेपालमा कोरोना संक्रमणबाट मृत्यु हुनेको संख्या ४ हजार ८४ पुगेको छ ।

पछिल्लो २४ घण्टामा देशभर गरिएको २० हजार ५९६ पीसीआर र ७ सय २० एन्टिजेन परीक्षणबाट थप ९ हजार ४८३ जनामा संक्रमण पुष्टि भएको छ । यो एकदिनमा संक्रमित हुने अहिलेसम्मकै उच्च संख्या हो ।

योसँगै सक्रिय संक्रमितको संख्या ९७ हजार ८ पुगेको छ । कूल संक्रमितको संख्या ४ लाख १३ हजार १ सय ११ पुगेको मन्त्रालयको तथ्यांक छ । गत २४ घण्टामा ५ हजार २ सय २५ जना संक्रमित निको भएका छन्।