झापा । कैलाली, बाँके, वीरगन्ज, दाङ , मोरङ र झापामा गरी कोरोनाबाट थप २० जनाको मृत्यु भएको छ ।
कैलालीमा ६ जना कोरोना संक्रमितको मृत्यु भएको छ । गएराति देखि आज बिहानसम्म तीन जनाको धनगढीस्थित सेती अस्पताल र तीन जनाको निजी अस्पतालमा मृत्यु भएको जिल्ला प्रशासन कार्यलयका सूचना अधिकारी शिवराज जोशीले जानकारी दिनुभयो ।
यस्तै बाँकेका अस्पतालमा उपचाररत थप आठ सङ्क्रमितको गए राति मृत्यु भएको छ । भेरी अस्पतालमा पाँच र शिक्षण अस्पताल कोहलपुरमा तीन गरी थप आठ जनाको उपचारका क्रममा मृत्यु भएको जिल्ला कोभिड सङ्कट व्यवस्थापन केन्द्र बाँकेका स्रोत व्यक्ति तेज वलीले जानकारी दिनुभयो ।
दाङको कोरोना विशेष अस्पताल बेलझुण्डीमा हिजो बेलुकी २ जना कोरोना संक्रमित पुरुषको मृत्यु भएको छ। घोराही उपमहानगरपालिका १२ का ७५ वर्षीय पुरुष र घोराही १८ का ५५ वर्षीय पुरुषको मृत्यु भएको अस्पतालका व्यवस्थापक द्रोण वलीले जानकारी दिनुभयो।
यसैबीच वीरगञ्जमा थप २ जनाको मृत्यु भएको छ । नारायणी अस्पतालमा वीरगञ्ज महानगरपालिका वडा नम्बर ६ आदर्शनगरका ६० वर्षीय वृद्धको आज बिहानै हृदयघातबाट मृत्यु भएको अस्पतालले जनाएको छ । वीरगन्ज ३ की ७२ वर्षीया महिलाको पनि आज बिहान मृत्यु भएको नारायणी अस्पतालका कोभिड संयोजक डा. सरोज रोशन दासले जानकारी दिनुभयो । पर्सामा आज थप ८५ जनामा संक्रमण पुष्टि भएको छ । जसमा ६४ जना पर्साका र अरु बारा, सर्लाही र रौतहटका छन् ।
यसैगरी मोरङमा थप एक जना संक्रमितको कोरोनाबाट निधन भएको छ । मोरङको ग्रामथान गाउँपालिकाका एक कोरोना संक्रमित पुरुषको मृत्यु भएको हो । सुनसरीको धरानस्थित बीपी कोइराला स्वास्थ्य विज्ञान प्रतिष्ठानको कोभिड अस्पतालमा उपचाररत ५० वर्षीय पुरुषको शनिबार राति १०ः१५ बजे मृत्यु भएको हो ।
यता , झापाको मेचीनगर–६ काँकरभिट्टाका अर्का कोरोना संक्रमितको मृत्यु भएको छ । ६० बर्षीय पुरुषको उपचारको क्रममा नोबेल मेडिकल कलेज विराटनगरमा गए राती मृत्यु भएको हो । उनलाई २४ गते शुक्रबार उपचारकै क्रममा कोरोना संक्रमण पुष्टि भएको थियो ।
योसंगै मेचीनगरमा कोरोनाको दोस्रो लहर चलेयता मृत्यु हुने कोरोना संक्रमितको संख्या तीन पुगेको छ । मृतक तीनै संक्रमित वडा नम्बर ६ का रहेका छन् ।
