नेपाल प्रिमियर लिग (एनपीएल) मा पोखरा एभेन्जर्सले कर्णाली याक्सलाई ६३ रनले हराउँदै पहिलो जीत हासिल गरेको छ ।
पोखराले दिएको २१८ रनको लक्ष्य पछ्याएको कर्णालीले १८ ओभर ३ बलमा सबै विकेट गुमाएर १५४ रन मात्र बनाउन सकेको थियो ।
कर्णालीका पवन सर्राफले सबैभन्दा धेरै ३२ रन बनाए भने आरिफुल इस्लामले २४ र दीपक डुम्रेले २२ रन बनाए । पोखराका मेहदी हसनले ३ विकेट लिएका थिए ।
यसअघि कीर्तिपुरको त्रिवि अन्तर्राष्ट्रिय क्रिकेट मैदानमा टस जितेर ब्याटिङ गरेको पोखराले २० ओभरमा ३ विकेट गुमाएर २१७ रन बनाएको थियो ।
पोखराका युवराज सम्राले शतक बनाए । सम्रा ४८ बलमा ६ छक्का र १० चौकाको मद्दतमा १०२ रन जोड्दै आउट भएका थिए ।
यस्तै कप्तान कुशल भुर्तेलले ६२ र चमिका करुणारत्नेले नटआउट ३५ रन बनाए । कर्णालीका कप्तान सोमपाल कामीले २ विकेट लिएका थिए ।
युवराज साम्राले एनपीएलको इतिहासमा चौथो र यो संस्करणमा पहिलो शतक बनाएका हुन् । यो जीतसँगै पोखरा ५ खेलमा २ अङ्क जोड्दै तालिकाको पुछारमा छ । कर्णाली लगातार तेस्रो हारसहित ५ खेलमा ४ अङ्कसहित सातौँ स्थानमा छ ।
एनपीएलमा आजको दोस्रो खेलमा चितवन राइनोज र काठमाडौँ गोर्खाज खेल्दै छन् ।







