झापाको बिर्तामोड-४ मा अवस्थित कञ्चनजङ्घा इङ्लिस सेकेन्डरी स्कुलमा अध्ययनरत प्रकृति दाहालले एसोसिएसन अफ चार्टर्ड सर्टिफाइड एकाउन्टेन्ट्स (एसीसीए) को परीक्षामा विश्वमै तेस्रो स्थान हासिल गर्न सफल भएकी छन् ।
दाहालले सन् २०२६ जुनमा सञ्चालित एसीसीएको फाइनान्सियल रिपोर्टिङ (एफआर) विषयको परीक्षामा विश्वस्तरमै तेस्रो स्थान हासिल गर्दै उत्कृष्ट नतिजा ल्याउन सफल भएकी हुन् ।
विद्यालयले यस सफलताको कदर गर्दै सोमबार आयोजित एक कार्यक्रमका बीच नगद १८ हजार ५०० रुपैयाँसहित दाहाललाई सम्मानपत्र प्रदान गरेको हो ।
कार्यक्रममा कञ्चनजङ्घा इङ्लिस सेकेन्डरी स्कुलका संस्थापक प्रिन्सिपल डा.केशवराज न्यौपाने र शिक्षा एकेडेमीका डाइरेक्टर सिए दिपक कायस्थले सम्मानपत्र प्रदान गरेका थिए ।
सोही अवसरमा उत्कृष्ट कार्यसम्पादन गर्ने बेस्ट पर्फर्मरहरू सन्ध्या उप्रेती, सुमन तिम्सिना, आयुस्मा आचार्य र बिपिका खरेललाई समेत सम्मान गरिएको थियो ।
अन्तर्राष्ट्रिय स्तरको प्रतिस्पर्धात्मक परीक्षामा दाहालले हासिल गरेको सफलताले विद्यालय, अभिभावक तथा झापाको शैक्षिक क्षेत्रमा गौरव थपेको स्कुलका संस्थापक प्रिन्सिपल न्यौपानेले बताए ।







